Heyva Sor a Kurdistanî, derheqê hetkarîya ke şarê Rojakewtena Kurdistanî rê kerdo de eşkerayîyêk weşanaye. Goreyê eşkerayîye; Heyva Sor a Kurdistanî şarê Rojakewtena Kurdistanî yo ke rîyê laserî ra zerar dîyo sey gama verêne 250 hezar euro hetkarîya madîye şawite.

Eşkerayîye de nê ameyî parekerdene:

''Rojakewtena Kurdistanî û Îran rîyê varano zêde yo ke 19'ê Adare de dest pêkerd û nêzdîyê di hewteyan dewam kerdibi de laser weriştibi. Bi weriştişê laserî xeylî bajarî, qezayî û dewî binê awe de mendibî. Rîyê laserî ra, 200 ra zêdeyî kesan cuya xo kerde vîndî, xeylî kesî zî bibî birîndar. Des hezaran keye û banî zî bî weran, û nika bi se hezaran merdimî Rojakewtena Kurdistanî de rewşêka xeternake de yê, coka seba heme hewcedarîyanê cuye paweyê hetkarîye. Ma sey Heyva Sor a Kurdistanî seba hewcadarîya şarê Rojakewtena Kurdistanî yo ke rîyê laserî ra zerar dîyo hetkarîye şawite. Na hetkarîye hetê komîteyanê Heyva Sore ra mexdûranê laserî rê do bêra vilakerdene. Kampanyaya hetkarîye ya ke ma seba Rojakewtena Kurdistanî 4'ê Nîsane de dabî destpêkerdene hîna dewam kena.’’

Heyva Sor a Kurdistanî vengdayîş bi heme Kurdistanijan û dostanê înan kerd ke paştdayîş bidê şarê Rojakewtena Kurdistanî û bi rayîrê Heyva Sor a Kurdistanî hetkarîya madîye biresnê keyeyanê mexdûran.