Hêzanê Xoverdayîşê Yewbîyayeyan waşt ke Kadikoy de bi eşkerayîyêke ronayîşê xo deklare bikerê. Polîsan hêriş kerd û heme rayîrî girewtî. Cayo ke tede eşkerayîye do biameyêne dayene zî pê barîyeran gerîya binê ablûqa.

Rixmê ablûqaya polîsan biseyan kesê ke verê banê HDPyî yê Kadikoy de ameyî têhet ver bi rihtimî kewtî rayîr. Rayrşîyayîş de sloganê yewbîyayîş û xoverdayîşî bîyî berz. Polîsan verê çalakwanan girewt. Rixmê hêrişê polîsan rayraşîyîşî dewam kerd. Çalakîya ke xeylêk kesî ameyî destbendkerdene de wekîlê HDPyî seba ke eşkerayîye bide ver bi rihtimî rayra şîyî.

Hêriş de wekîlê HDPyî Gulîstane Kiliç Koçyîgît, Nurane Îmîr, Dîlane Dîyaret Taşdemîr, Kemal Bulbul, Dilşate Canbaz û Musa Pîrogluyî rê şîdet ame kerdene û polîsan cehd kerd ke wekîlan destbend  bikerê. Şarî pê tîlîlîyan û çepikan cewabê hêrişê polîsan da.  Wexto kilm de serebutî heme kuçeyanê Kadikoyî ra vila bîyî. Şarî ard ziwan ke ê heta ke eşkerayîye medê do vila mebê. Netîceya hêrişî de Muxabîra Ajansê Mezopotamya (MA) Rojîne Altay, Muxabîrê Ameyoxê Azadî Taylan Oztaş  û sîyasetmedarî zî tede xeylêk kesî raştê hêrişî ameyî û ameyî destbendkerdene. Êyê ke ameyî destbendkerdene  wesayîtanê polîsan de sloganan rê dewam kerd.

Wekîlanê HDPyî vera hêrişana hêrsê xo ard ziwan. Gulîstane Koçyîgît vera hêrişan hêrs bîye ard ziwan  ke mabênê roje de Kadikoy  de hêrişê şarî kenê. Dilşate Canbaz Kaya zî rewşe sey ''eybê welatî'' name kerd û vat mudîrê asayîşî bi xo dayo aye ro. Musa Pîrogluyî zî hêrsê xo ard ziwna û vat: '' Nê taployî ramojna ke nê welat de terorîst kam o, şima zalim ê.'' Nurane Îmera ke pê şîdetî wesayîtê destbendkerdişî rê ameye cinişnayene vat: '' Eke şima eşkenê ma bikeşê, biqedînê.''

Hemsereka DBPyî Salîha Aydenîz zî vat: ''ŞÎima ewro reyna rîyê xo eşkera ramojna.'' Nayî ser o polîsî şîyî Aydenîze ser ke aye destbend bikerê la wekîlan û şarî destûr nêda.