Endamê Konseya Merkezî ya TTB’î Halîs Yerlîkayayî vat, “Dimayê grevê vêşanîye yê dergi ra ganî werî û şimitişî hêdî hêdî bêrê werdene û şimitene. Qaydeyêko muhîm o sereke zî no yo ke wa çalakgerî reyêk de weranê wuşkan mewerê.”

Endamê Konseya Merkezî ya Yewîya Tabîbanê Tirkîya (TTB) Dr. Halîs Yerlîkayayî derheqê halê weşîye yê tepişteyan û çîyanê ke ganî bêrê kerdene de hayîdarîyî dayî. Yerlîkayayî vat grevê vêşanîye yo demderg serê weşîye de tehlukeyanê pîlan virazeno û vat, “Ganî no proses bi doneyanê îlmîyan bêro rayraberdene. Eke goreyê doneyanê îlmîyan tê nêgêrê, werdişê werî beno ke bibo sebebê rîskan û ganî goş bidê nê ser.” Yerlîkayayî seba Amedî zî vat, “Sere de yê ke rojeyê mergî de yê, 36 tepişteyî ameyî berdene bi nêweşxane. Ewro înan ê nêweşxane ra vetî. Gama ke înan ê berdê nêweşxane dayo înan ro û serê cayî de ameyê kelemçekerdene. Bi mabênkarîya ma û parlamenteran no hal ame rastkerdene.”

Doktoran Ser o Zextî Estê

Yerlîkayayî vat, “Ê tepişteyê ke Zîndanê Tîpê D û T’yî ra ameyî ardene bi nêweşxane muayeneye înan pêrune ame kerdene. Tîya de proses wina bi, la ma zanê ke pêroyê Tirkîya de problemî estbî. Bi rayîrê masaya krîzî, ma pêhesîyayî gama ke înan ê berdê bi ringan berdê, bi saetan kelemçe de verdayê û ring de ameyê verdayene. Heman wextî de ma zanê ke seba tepişteyî nêweşxaneyan de nêrê tedawîkerdene doktoran ser o zextan kenê. Ma do derheqê îdareyanê zîndanan ê ke goreyê qaydeyan tê nêgêrayê prosesê qanûnîyî bidê destpêkerdene. Ma doktoran ra zî vat qaydeyê unîversalî û etîkî çi yê ganî şima goreyê ê qaydeyan tê bigêrê.”

‘Ganî Goreyê Programo ke Ameyo Pêşnîyarkerdene Tê Bigêrê’

Yerlîkayayî vat zîndanan de ganî goreyê lîsteyanê dîyetan ê ke algorîtmaya înan hetê înan ra pêşnîyarkerdene tê bigêrê. Yerlîkayayî peynîya qiseykerdişê xo de nê vatî: “Dimayê grevê vêşanîye yê demdergî ganî werî hêdî bêrê werdene û şimitişî hêdî bêrê şimitene. Qaydeyanê serekeyan ra yew o yo ke çalakgerî weranê wuşkan mewerê.Ganî tepişteyî xo şekirî ra dûrî bidê, xusûsen şekirê loqim, rîçal, û dimsî ra dûrî bidê. Çaya zelale, awa mêweyan û şorba bişimê. Weranê qelênayeyan ra zêdeyêr weranê girênayeyan biwerê. Ganî xo çîyanê ke gaz virazenê û solinan ra dûrî bidê, vîtamîn bigêrê û 3 mengan ra reyêk kontrol bibê. Heke doktorî yan zî wezîfedarê weşîye kemasîyêk bikerê ganî nê bêrê vatene, seba ke pratîkê winayênî tekrar nêbê no muhîm o. Peynî de ma reyna vanê ganî prosesê werdişî û şimitişî rind bêro rayraberdene. Eke problemêk virazîyo ganî muracatê sazîyanê weşîye bikerê.”