Besê Hozate Stêrk TV’yî de beşdarê yew programê taybetî bîye û derheqê Newroze, Hewteya Qehremanîye, tecrîdê Îmralîyî, weçînayîşê herêmîyî û binkewtişê DAÎŞ’î de rojdemî ercnayî. Hozate bi yadkerdişê şehîdanê Newroze dest bi qiseykerdişê xo kerd û wina va: ”Ez sere de Newroza Rayber Apoyî, ê şarê ma, ê Leyla Guvene û Nasir Yagizî, Newroza pêroyê xoverdayoxanê grevanê vêşanîye û pêro şaranê Rojakewtena Mîyanêne pîroz kena. Reyna şexsê Mazlum Doganî de pêro şehîdanê Newroze yad kena.

Ma vera menga qehremanîye şonê. Ez şexsê heval Egîdî de pêro şehîdanê şoriş û azadîye bi hurmet yad kena. Adare mengêka muhîme ya. Pêro xoverdayîşê pîlî na menge de qewimîyayê.

Rayber Apoyî ser îşkenceyêko pîl yeno bicaardene. Îmralî de polîtîkayê qirkerdişî yenê domnayene. Dewlete Îmralîyî ra dot, pêroyê Kurdistanî de û herême de nê polîtîkayan ana bicaardene. Nê polîtîkayan ver xoverdayîşêko pîl esto. Ewro serkêşê nê xoverdayîşî Leyla Guvene, Nasir Yagiz û xoverdayoxê zîndanan ê. Reyna Strasbourg, welatanê Ewropa yê cîya-cîyayan de, Vakur de, merkezanê HDP’yî de xoverdayîşê pîlî yenê domnayene. Rojawan de û Ewropa de şarê ma warişto payan ser.

CEHDÊ KE SEBA ŞIKITIŞÊ TECRÎDÎ YENÊ DAYENE BESÎ NÎYÊ

Kurdistan û welatanê bînan ra, seba xoverdayîşanê grevanê vêşanîye paştdarîyê pîlî yenê dayene. Şarê ma wayîrê xoverdayoxan vejîno, no çiyêko muhîm o. Komelê mîyanneteweyî de zî paştdarîya muhîme yena dîyayene. La nê besî nîyê. Bi taybetî Vakur û Tirkîya de bi mîlyonan şarê ma esto. Hêzê demokratîkî ganî hîna zêdê vengê xo bivejê û hîna zêde wayîr bivejîyê.

Tecrîdê Îmralîyî şarê Kurdî rê, Tirkîya rê û hêzanê demokrasîyî rê zî yeno kerdene. Dewleta Tirkî, şexsê Rayber Apoyî de, vera pêro Kurdan şer îlan kerdo. No şer tena vera Kurdan nê, vera pêroyê şaranê Tirkîya ameyo îlankerdene. Ganî ma na rastîye baş fehm bikê Nêmeyê komelî îqtîdarê AKP-MHP’yî yê faşîstî nêwazeno.  Îqtîdar xêrca teda, îşkence, vêşanîye, janî ra dot çiyêk nêdano nêmeyê komelî. Yanê nêmeyê komelî binê tecrîdî de yo. Kes nêeşkeno fikrê xo eşkera bikero. Kes nêeşkeno cuya xo bi hawayê demokratîkî biciwîyo.

PROBLEMÊ BEKAYÎ YÊ ERDOGAN Û BAHÇELÎYÎ ESTO

Tirkîya de hiqûq û demokrasî nêmendo. Rewşa Tirkîya ya warê ekonomî, komel û sîyasîyî de başe nîya. Pêro şar mabênê şerî de yo. La AKP-MHP netewperestîye hîna keno berz. Wazeno ke hawayê tersî biko vila. Her roje vano problemê bekayî esto. Merdim ke rast biewno ci, problemê bekayî çin o. Problemê bekayî yê Erdogan û Bahçelîyî esto.

Problemê bekayî yê Tirkîya, îqtîdarê AKP-MHP’yî yo. Ê bi xo problemê bekayî yê. No îqtîdar ke mabên ra bêro wedaritene, Tirkîya de problemê ekonomî û komelkîyî nêmanenê. No îqtîdar seba weşîya xo problemê bekayî vejeno û domneno. Azadbîyayîşê Tirkîya, xoîdarekerdişê Kurdan, xoserîya demokratîke ya Başûrî, demokratîzebîyayîşê Tirkîya çira beno problemê bekayî? Eksê ci, çareserbîyayîşê problemê Kurdan do Tirkîya hîna bikero bihêz.

MUXALEFETÊ TIRKÎYA XURT NÎYO; HDP TENA MANENO

Tirkîya de muxalefet xurt nîyo. Îqtîdarê AKP-MHP’yî bi polîtîkayanê faşîzmî şono Kurdan ser û sebebê ci zî xurtnêbîyayîşê muxalefetî yo. Muxalefet zehîf û parçe-parçe yo. Hêzê demokratîkî zî pîya tê nêgêrenê. Her kes sey blok, sey cephe nê, goreyê xo mucadele keno. Naye ra zî îqtîdar hîna zêde hukmê xo domneno. Muxalefeto xurt o ke vera nê polîtîkayan de vindeno tena HDP yo û HDP zî tena maneno.

Vera HDP’yî polîtîkayê qirkerdişî, polîtîkayê tasfîyekerdişî yenê bicaardene. Sîyasetmedar û parlamenterê ci hepisxaneyan de yê. HDP’yî rê her roje hêrişî yenê kerdene. Seba ke faşîzm bêro çinkerdene, ganî mucadeleyêko pîl bêro dayene. Mucadeleyê HDP’yî hêca yo helbet. Vera hende şer, teda û tasfîyeyî xo ver dano. La bes nîyo.

NO WEÇÎNAYÎŞ ZÎ YEW PARÇEYÊ XOVERDAYÎŞÎ YO

Erdogan vano kesê ke qalê nasname û bawerîyanê cîyayan kenê wa şorê welatanê bînan. No faşîzm o, na netewperestîye ya. Erdoganî hesabê xo kerdo vano ez çiqas ke Kurdan rê dişmenîya bika, hende zêde reyan gêna.

Îtîfaqê AKP-NHP’yî yo faşîst 4 serrî yo ke vera Kurdan qetlîaman keno. Waşt ke îradeyê şarî bişikno û têgêrayîşê azadîye tasfîye bikero. Nêwazeno ke kes vera ey bivejîyo. Ewro ma vînenê ke Tirkîya de xoverdayîş her ke şono beno pêt. Destê AKP’yî de tena yew çî mendo. Na zî netewperestîye ya. Sîyasetê AKP-MHP’yî şarî keno parçe û verdano rê yewbînan. No îqtîdar keno ke bi nê qeydeyî payan ser vindero.

No weçînayîş zaf muhîm o. No weçînayîş bingehê rijnayîşê faşîzmî, şikiyayîşê tecrîdî, azadîya Kurdistanî xo mîyan de nimneno. Ganî ma weçînayîşê 31’ê Adare sey yew parçeyê mucadeleyî bivînê. No weçînayîş de şaro Kurd û hêzê demokrasîyî do bibê serkewte.

KURDÊ KE BAJARANÊ TIRKÎYA DE CIWÎYENÊ MIHEQEQ REYANÊ XO BIERZÊ CI

AKP’yî pêro şaredarîyê Kurdan îşxal kerdî, bi qeyûman xesp kerdî. Nika firsend esto. Şaro Kurd, ganî no weçînayîş de cewabêko pîl bido. Şarê ma têgêreno û her ca de bîyo seferber. HDP her ca de baş yeno qebulkerdene û no zî sîyasetê Erdoganî keno pûç. Erdogan seba ke Kurdistanî îşxal bikero manayan nêvîneno êdî. Eleqaya AKP’yî bi Îslamîyetî çin a. Seba ke Kurdan çin bikero dînî îstîsmar keno. Nê sîyasetî îflas kerdo.

Kurdî xo çim ra vetê û vano Kurdistan çin o û Kurdî welat ra bivejîyê şorê. Wazeno ke Kurdan tehrîk bikero û nêverdo wa şorê sindoqe ser. AKP-MHP keno ke bi nê qeydeyî weçînayîş de bibo serkewte. Ganî şarê ma na rastîye baş bivîno. Ganî îqtîdar derbêka başe bigîro. Xêrca tayê xayînan kes reyanê xo nêdano AKP’yî.

HETA KE AKP NÊQEDÎYO, DAÎŞ ZÎ NÊQEDÎNO

Hêzê Surîye, 7 serrî yo ke vera DAÎŞ’î şer kenê. Şarê Kurdî û şarê Vakurê Surîye bi xoverdayîşê pîlî vera DAÎŞ’î mucadele kerd. Çeteyê ke Efrîn, Cerablus, Bab û Ezaz de yê, DAÎŞ’î ra cîya nîyê. DAÎŞ’î ra ver El Nusra bi, hêrişê Serêkanîye kerd. Nê çeteyî peyê cû bîyî lete û hêrişê bajaranê Surîye û Iraqî kerd. Peyê cû nameyê DAÎŞ’î vejîya meydan. Nê pêro parçeyê EL Nusrayî yê. Mabênê ci de ferq çin o.

Pişta nê çeteyan de îqtîdarê AKP-MHP’yî esto. Xora AKP DAÎŞ’ê Tirkîya yo. DAÎŞ bi xo zî xora AKP yo. Surîye de merkezê ci Reqa, Iraq de zî Musûl o. DAÎŞ’î waşt ke hem Surîye hem zî Iraq de dewleta xîlafetî awan bikero. Ma çeteyê DAÎŞ’î qedîyayê? Nê, nê çeteyî nika Cerablus, Efrîn, Ezaz û Îdlib de yê. Ganî mucadele bêro domnayene. Reqa û Dêra Zor de hucreyê ci estê.

Vakurê Surîye de hucreyê ci estê. Dewa Baxozî zî do na menge de bibo azad. La DAÎŞ do bi hawayêkê bînî dewam bikero. O do bi nameyanê neweyan xo bidomno. DAÎŞ do alozîye bifîyo kar û bombayan bido teqnayene. DAÎŞ wina asan mabên ra we nêdarîyeno. Çunke AKP esto. Heta ke AKP îqtîdar de bo, DAÎŞ nêqedîyeno. AKP do hetê lojîstîk, leşkerî û polîtîkî ra paştdarîye bido DAÎŞ’î.

TIRKÎYA BÎYA MERKEZÊ DAÎŞ’Î

Tirkîya bîya merkezê DAÎŞ’î. DAÎŞ keno ke bajaranê Tirkîya û Vakurî de xo rêxistin bikero. Nê pêro çeteyî Tirkîya ra derbazê Surîye bîyî. Dewleta Tirkî perwerde dayo înan û sînor ra derbaz kerdê. Naye ra zî Tirkîya xo rê sey ware vînenê. Hêzê mîyanneteweyî û Amerîka ke wazena DAÎŞ’î biqedêno, o wext ganî îqtîdarê AKP’yî biqedêno.

Dewleta Tirkî wayîrê çeteyan vejîna. Ewro ra dima şerê Cerablus, Efrîn, Bab û Ezazî do hîna bibo gur. Çeteyê ucayî pêro DAÎŞ’î yê. AKP zî îdareyê DAÎŞ’î yo sîyasîyî yo. Destê QSD’yî de, bi hezaran çeteyê DAÎŞ’î estê. Derheqê nê çeteyan de, ganî her kes xo wezîfedar bivîno. Ganî Hêzê Koalîsyonî û dewletê Ewropa wezîfedarîye bigîrê. Bi hezaran çeteyî Rojawan ra ameyê. Tayê ci Rûsya, tayê ci Çîn û Kafkasya ra ameyê.

ÎDAREYÊ ŞAMÎ GANÎ KURDAN BIGÎRO XO HET

Ganî îdareyê Şamî rastîya Sûrîye baş bivîno û fehm bikero. Îdareyê Şamî vano qey Sûrîye ya kane ya. Sûrîye êdî Sûrîye ya kane nîya. O wext derbaz bi. 8 serrî yo ke Sûrîye de şerêko pîl esto. Sûrîye bîya lete-lete. Nika rojawanê Firatî hetê Tirkîya ra ameyo îşxalkerdene. Tirkîya wazena ke rojakewtena Firatî zî îşxal bikero. Tirkîya wazena ke pêroyê Vakurê Sûrîye îşxal bikero.

Tirkîya kena ke vera şarê Kurdî û vera şaranê Vakurê Sûrîye, planê Mîsak-i Mîllîyî bikero dewre. Planê ci yo stratejîk wina yo. Nika Efrîn, Cerablus û Bab îşxal kerdo û Îdlib de zî alozîye fîsta kar. Tirkîya Rûsya de îtîfaq kerdo û nêwazena no îtîfaq bixerepîyo. No îtîfaq fîîlîyat de nêşono ser. Rûsya Îdlib bi rojan bombarduman kerd. Rûsya nêwazena ke Tirkîya hêrs bikero, çunke mabênê ci de peymanê ekonomîyî estê. Peymanê enerjî û çekan estê. Rûsya nêwazena nê peymanan bixerepno.

ÎTÎFAQÊ KURD-EREBÎ ÎTÎFAQÊKO STRATEJÎK O

Dewleta Tirkî wazena ke Efrîn, Cerablus, Ezaz û Babî bigîro xo het. No plan Soçî de ame ronayene, la aver nêşi. Rûsya Tirkîya ra va ‘Ti ke wazena herêma ewlehîye bibo, o wext El Nusrayî tasfîye bike.’ La Tirkîya El Nusra hîna kerd hêzdar. Rûsya na rewşe qebul nêkena û wazena ke El Nusra tasfîye bibo.

Mabênê Rûsya û Tirkîya de peymanêka nimteye esta. Waşt hêzêkê şirîgî awan bikerê û pîya kontrol bikerê. Mabênê plananê Rûsya û Tirkîya de parçebîyayîşê Sûrîye zî esto. Reyna mabênê Amerîka û Rûsya de zî planêko winasî esto. Îdareyê Şamî ganî nînan baş bivîno û Kurdan de îtîfaqêko baş rono. Îtîfaqê Kurd-Erebî îtîfaqêko stratejîk o.