Çalakîya grevê vêşanîye ya ke hetê 14 sîyasetmedar û aktîvîstanê Kurdan ra  vera tecrîdê Rayberê Şarê Kurdî Abdullah Ocalanî Strasboûrgî yê Fransa de ameyebi destpêkerdene, kewte roja 75’ine.

13'ê Sibate de bi nameyê çalakwananê grevê vêşanîye yê Strasboûrgî Hemserekê KCDK-E'yî Yuksel Koçî, Serekkomarê Elmanyayê Franz-Walter Steînmeîer, Serekwezîre Angela Merkele û Wezîrê Karê Teberî Heîko Marsî rê mektubêk şawitibi.

Şawitişê muktube ser o di hewteyî derbaz bibê zî selahîyetdaranê Hukmatê Federalî derheqê mektube de eşkerayîye nêdaye, Partîya Çepe babete berde rojdemê Meclîsê Federalî.

Parlamenterê Partîya Çepgire Gokay Akbulute, bi di persan, ke Hukmato Federal ra persaye, hem derheqê mektuba Yuksel Koçe de û hem zî derheqê mektuba Dîlan Koçe persa û cewab waşt. Yeno pawitene ke Hukmato Federal zereyê hewteyê verê ma de cewab bido persanê Akbulute. Persê Akbulute wina yê:

Serekwezîrtîye û Wezareta Karê Teberî çi cewabî dayî mektuba 13'ê Sibate ya bi îmzeya Yuksel Koçe, na mektube senî ameye ercnayene?

Dimayê cewabdayîşê mektuba Dîlan Koçe, derheqê protesto yo ke verê Meclîsa Federalî de bêro kerdene de, Hukmato Federal çi fikirîyeno?

Kênaya Yuksel Koçî, Dîlan Koç a 19 serrîye mektubêk Hukmato Federal rê şawitîbî û vatîbî, eke Hukmato Federal vera tecrîdî game nêerzo ê do verê Meclîso Federal de dest bi çalakîya grevê vêşanîye bikerê.

Yuksel Koç mektuba xo de serekwezîrê 1970'yî yê Almanî Wîlly Brandt ardibi vîrî, vengdayîş kerdibi ke selahîyetdarî nikayî zî sey Brandtî bibê wayîrê polîtîkayêka cesûre, seba tecrîd bêro wedaritene, waştibi ke selahîyetdarê Almanî game bierzê.

Îdarekerîya Çapemenî û Enformasyonî yê Hukmatê Federalî derheqê mektuba Dîlan Koçe  de vatibi, çîyêko ke ê seba pîyê Yuksel Koçe bikrê çin o û Dîlan Koçe ra waştibi ke a şora pîyê xo qan bikera ke o bi rayîrêko bîn bîçalakîya xo bidomno.