Wekîlê Partîya Çep a Keske yê Îdirî Yilmaz Hunî derheqê tecrîdkerdişê Rayberê Şarê Kurdî Abdullah Ocalanî û binpaykerdişanê zîndanan de ANFyî rê qisey kerd.

Hunî da zanayene ke zîndanan de sûcê vera merdimatîye yenê kerdene û vat: ''Peymanê mîyanneteweyî û qanûnî zî tede derheqê tepişteyanê nêweşan de qayîdeyî est ê. La wextê nê îqtîdarî de zîndanan de vera tepişteyanê nêweşan polîtîkaya îmha yena caardene. Embazê ma rixmê nêweşîyanê xo yê giranan zî ne vera dîyene ne zî tedawî benê. Partîya ma derheqê zîndanan de planan amade kena. Ma do bikerê ke Meclîs de nînan ser o bixebitê.''

Hunî bale ante ser ke bi operasyonanê qirkerdişê sîyasîyî her roje hûmara zîndanan zêdîyena û vat: ''Bi taybetî Îdir de Zîndanê Tîpê Syî ser o zaf gerreyî yenê goşê ma. Hucreyanê yewkesî de tepişteyan rê seke îşkence yeno kerdene. Ma na babete teqîb kenê.''

Hunî pare kerd ke îqtîdar keno ke pê polîtîkayanê îmha-tersnayîşî-acizkerdişî şarê kurdî çin bikero û vat: ''Kurdî teyna azadîye, edalet, têdûştîye wazenê. Weçînayîşan ra nata ma prosesê verê ma ser o kombîyayîşan kenê. Ma do tesbît û pêşnîyazanê şarê xo biercnê, tewirêkê hemparî bimojnê û goreyê nînan yew perspektîfê xebate awan bikerê.''