Bajarê Kolnî yê Almanya de vizêr saetanê şanî de 50 hunermandê kurdan kombîyayîşêk kerd û bale antê muhîmîya yewîya kurdan ê vera îşxalê dewleta tirke ser.

Kombîyayîşî de verî Hozan Dîyarî qisey kerd. Dîyarî ard ziwan ke şarê kurdî şertê Peymana Lozanî lete kerdî û vat: ''Şarê kurdî pê bedelanê pîlan heta ewro ame. Nika semedê ma wextê şefeqî yo. Tarîx reya verêne ma rê wîyeno. Ma nêtîceyê muhîmî fînayî dest. Şarê kurdî wazeno ke bibo wayîrê statuyî. Şertê nayî yenê afernayene. Dewlete serdestî wazenê verê nê şertan bîgirê. Erdoganî ke dinya de vînî kerdo, wazeno kurdan biverdê yewbînan û xo bixelisno. Dewleta tirke pê îşxlakerdişê Rojawan û Başûrê Kurdîstanî wazena destkewteyanê kurdan destê înan ra bîgiro. Dişmenî Başûrê Kurdîstanî de 70 baregehê leşkerî nayî ro. Amedekarîya pîle esta. Statuyê Başûrê Kurdîstanî binê tehlukeyî de yo. Eke şerê zereyî bibo, ma do seserrêka bîne vînî bikerê. Eke ma Başûrê Kurdîstanî de vînî bikerê ma heme Kurdîstan de vînî kenê. Beno ke siba erey bo, ganî ma ewro bigurîyê ke hêzê sîyasîyî bibê yew.''

Hekîm Sefkanî zî vist vîrî ke şerê zereyî tim kurdan rê dano vînkerdene û vat: ''Dewleta tirke zaf hole zana ke eke ma kurdî yewîya xo ya sîyasîye rone serdestîya înan cade qedîyena. Coka cehd kenê ke kurdan biverdê yewbînan.''

Babîyê şehîdan Hozan Comert zî balê ante qirkerdişanê ke dewleta tirke vera kurdan kerdî ser û vat: ''Mesela Erdogan yan zî yew rayber nêyo. Mesela sîstemê vera ma ya.'' Comertî vat: ''Hema ke qet konsolosxaneyê çewî Musul de çînêbi tirkan ûca konolosxane akerd û nê konosloxaneyî çeteyê DAÎŞî perwerde kerdî û semedê hêrişî şawitî. Çeteyan hêrişê Şingal, Hewlêr û Rojawnaî kerd. Eke ma bibê yew ma eşkenê vera heme hêrişan vejîyê.''

Reyna heme hunermdanê bînan zî derheqê muhîmîya yewîya kurdan de qisey kerd û vat ganî vera îşxalî çîyêk bêro kerdene.

Şiwan Perwerî ke peynî de qisey kerd vat: ''Ma di serranê peyênan de yenê tehêt û tewrê qewimîyayîşanê sîyasîyan ê Kurdîstanî benê. Ganî ma xebatanê xo yê hunerî zî xurtêr bikerê. Huner sîyasetî rê yew rayîr akeno.'' Perwerî waşt ke wa yew dezgeho bi nameyê Hêzê Yewîya Hunermandan bêro ronayene û vat: ''Almanya de 3 mîlyon kurdî estê. Ganî  Akademîya Neteweyîye ya Yewîya Hunermendan bêro ronayene.''