Endama OHDyî ya Wanî Avûkate Mehtape Işik bale ante tecrîdê vera Rayberê Şarê Kurdî ser û da zanayene ke 10 serran de seba pêvînayîşî 942 muracatî ameyî kerdene û nînan ra têna 5ê ci rê cewabo pozîtîf dîya.
Endama Komeleya Huqûqnasanê seba Azadîye (OHD) ya Wanî Avûkate Mehtape Işik tecrîdê vera Rayberê Şarê Kurdî Abdullah Ocalanî û grevê vêşanîye ANFyî rê ercnayî.
Mehtape Işik vist vîrî ke Abdullah Ocalan sibata 1999î teslîmkerdişê Tirkîya ra nata binê tecrîdî de yo û mabênê 27ê temmuza 2011î -21ê çeleyê 2021î de bi temamî seba pêv.înayîşê avûkatan 942 muracatî ameyî kerdene. Mehtape Işik eşkera kerd ke 2019 de nînan ra 5ê ci rê cewabo pozîtîf dîya. Mehtape Işik da zanayene ke mabênê nê tarîxî de tewr tay 400 muracatê seba pêvînayîşê keyeyan ameyî kerdene û netîceya nînan de 26 pêvînayîşê keyeyî, 3 pêvînayîşê wasîyî ameyî kerdene. Mehtape Işık vat: ''Goreyê texmînan 21 serranê Îmraliyî de avûkatan 1800 reyî seba pêvînayîşî muracat kerd û nînan ra 1355ê ci ameyî redkerdene.''
Mehtape Işik ard ziwan 27ê nîsana 2020î de reya verêne Zîndanê Îmraliyî de heqê telefonî şuxilîyabi û vat: ''O çaxî ra nata pêvînayîşêk nêame kerdene. 2021 de tedaya rayaumûmîye ra pêvînayîşê telefonî yê 4-5 deqayan ame kerdene û telefon cade birîya. Serra 2019î de netîceya grevê vêşanîye de tecrîdê Îmraliyî tayêk amebi şiknayene. O çax Wezîrê Edaletî bo xo ardbi ziwan ke verê pêvînayîşê Îmraliyî de astengîyêke çin a. La dima tecrîd newe ra ame caardene. Tecrîdê vera Birêz Ocalanî sîyasî yo. Heqê pêvînayîşî yê ey bi hawayêkê îlegalî yeno astengkerdene. Coka no tecrîd sîyasî yo.''
Avûkate Mehtap Işik bale ante ser ke vera tecrîdî û binpaykerdişanê heqanê tepişteyan 27ê teşrîna verêne ya 2020î ra nata zîndanan de grevê vêşanîye esto û vat: ''Ewro 107 zîndanan de grev dewam keno. Verî zî vera tecrîdê Îmraliyî grevê vêşanîye amebi kerdene û tecrîd bi hawayêkê demkî wedarîyabi. La 7ê tebaxa 2019î ra nata qedexeyê pêvînayîşî yeno caardene. Tepişteyî vanê heta ke waştişê înan qebul nêbê ê grevî ra fek vera nêdanê. Mewzuatê vera tepişteyan zaf giran o û no mewzuat dûştê Qaîdeyanê Mandelayî yê Neteweyanê Yewbîyayeyan, şîretanê CPTyî û Qanûnê Înfazî yo. Ganî Wezaretê Edaletî cade mewzuatê tecrîdî wedarno û avûkatî pêvînayîşan bikerê.''
Mehtape Işik îfade kerd ke grevê vêşanîye roja 155. de dewam keno û heta nika selahîyetdaran gamêke nêeşte. Işike vat: ''Ma qerqilîyenê ke netîceya grevê vêşanîye de mergî biqewimîyê. Ma sey avûkatan do babete teqîb bikerê, raporan amade bikerê. Ma do tepişteyan têna nêverd û bibê vengê waştişanê înan ê meşrûyan.''
