Wekîla verêne ya HDPyî ya Colemêrgî û Hemsereka verêne ya KCDyî Selma Irmak derheqê tecrîdê vera Rayberê Şarê Kurdî Abdullah Ocalanî, dewaya qefilnayîşê HDPyî û tedayanê vera sîyasetê kurdan de ANFyî rê qisey kerd.

Irmake ard ziwan ke dewaya qefilnayîşê HDPyî huqûqî ney sîyasî ya û vat: ''Îqtîdar wazeno weçînayîşan ra ver şarî konsolîze bikero û rayanê HDPyî bihelîno. Xora na dewa têna bi weçînayîşî eleqedar nîya. Na polîtîka vera kurdan û muxalîfan polîtîkaya çimtersnayîşî ya. Her ke têkoşînê kurdan o sîyasî beno pîlêr dewlete ney xo rê kena mesele. Îrtîca, hêzê dînî û rêxistinê muxafazekarî hînî seba mendebîyayîşê dewlete sey hêzanê tehlukeyînan nênê dîyenê la hêzo rêxistinkerde yê kurdan wina dîyeno. Îqtîdar eşkeno HDPyî biqefilno la nêeşkeno îradeyê şarî bixefilno.''

Irmake îfade kerd ke tecrîdê vera Rayberê Şarê Kurdî û qefilnayîşê HDPyî nêeşkenê meseleya kurdan binimnê û vat: ''Birêz Ocalanî seba haştîye zaf reyî xîret kerd, veng da û waşt ke dîyalogî wa bêrê kerdene. La dewlete tim bi şîdetî cewab da nînan. Qet yew cayê dinya de meseleyêke pê şîdetî çareser nêbena. Meseleya kurdan hînî asta dîyalogan de ya. Birêz Ocalan 24 serrî yo yeno tecrîdkerdene. Senî ke Birêz Ocalan bi komployêkî teslîmê Tirkîya ame kerdene, tecrîdê vera Birêz Ocalanî zî heman polîtîkaya mîyanneteweyî ya. Eke dezgehêko sivîl ê sey CPTyî wezîfeyê xo yê seba teqîbkerdiê kerdişanê xiran û îşkenceyî nêkeno û goreyê destûrê Tirkîya têgêreno, no rewşa tehlukeyîne mojneno.''

Irmake vist vîrî ke avûkatê Buroyê Huqûqî yê Asrinî vato ke Ocalanî pêvînayîşê bi CPTyî red kerdo. IRmake vat: ''Tecrîd şexsê Ocalanî de vera haştîya şaran yeno caardene. Şarê kurdî her cayê dinya de vera tecrîdkerdişê Birêz Ocalanî bi hawayêkê heqdarî nêrazîbîyayîşê xo mojneno û vera polîtîkayanê şîdet û neçareserkerdişî yê dewlete xo ver dano.''