Endamê Delegasyonê Aşitîye yê Mîyanneteweyîye semedê zîyaretkerdişê Rayberê Şarê Kurdî Abdullah Ocalanî ameyî Tirkîya. Heyetê semedê pêvînayîşê Ocalanî Wezîrîya Edeletî rê mektub nuşt. Wezîrê Karê Zerîyî û Edelatî yê Îzlanda yo verên Ogmundur Jónasson o ke mîyan heyet de ca gêno derheqê babete de ANF’yî rê qisey kerd.
OCALANÎ GAMÊ MUHÎMÎ EŞTÎ
Jónassonî bale ante muhîmîya rolê Ocalanî ser û va: ‘‘Cehdkerdişê aşitîye yê Ocalanî yê serranê 2013-2015‘ zaf muhîm bî. Wextê pêvînayîşê aşitîye de mabênê birêz Ocalanî û Erdogan de xebetêk ameye kerdene. La ewro halê Tirkîya hol nêeseno. Ma bi birêz Leyla Guvene û sazîyanê sivîl ê komelî dir pêvînayîş viraştî. Tena yew rojdem bibi o zî tecrîd bi. Eke tecrîd wedarîyo rayîrê dîalogî beno a. Ma semedê aşitîye Tirkîya de yê.‘‘
GANÎ TECRÎD BÊRO WEDARTENE
Jónassonî vat ke Ocalan tena semedê Tirkîya nê semedê heme dinya perspektîfê cuyaya neweye teqdîm keno û wina dewam kerd: ‘‘ Ocalan modeleyê cuyeyêka newe, azad û demokratîke peşnîyaz keno. Bitaybetî zî semedê azadîya cinîyan birêz Ocalan mucadeleyêko gird dano. Tecrîdê serê Ocalanî nêno qebûlkerdene. Vera Ocalanî caardişê taybetî dewre de yê. Tirkîya goreyê huqûq û pêkerdişê mîyanneteweyîye tê nêgêrena. Waştişê xoverdayoxanê grevê vêşanîye eşkera yo. Wazenê ke tecrîd bêro wedartene û no waştişêko biheq o.‘‘
CPT GANÎ WEZÎFEYÊ XO BÎYARO CA
Jónassonî tewirê CPT’yî yê vera Îmraliyî zi wina ercna: ‘‘Ez bi xo tim vera bêvêngîya CPT’yî ya. Ganî ê kare xo bikerê û wezîfeyê xo bîyaro ca. Parlamentoya Ewropa semdê wedartişê tecrîdî çend rojî cuwa ver qerarêk girewt. Ma zî sey yew heyetî paştî daye nê qerarî. Tirkîya de Kurdan ser o zexto gird esto. Ganî heme dinya na raştîye bîvîne û vera nê zulmî bikewe dewre. Leyla Guvene vat ke ‘Merdişê mi beno ke tecrîd wemedaro la beno wesîleyê rojdemkerdişê tecrîdî‘ wezîfeyê ma tîya de pawitişê demokrasî û heqê merdiman o. Ma wazenê ke vengê Leyla Guvene rê veng bê.‘‘