Wekîla Partîya Çep a Keske ya Wanî Gucane Sayyigit Kaçmaz derheqê weçîtişê serekkomarîye de qisey kerd û semedê şuxulnayîşanê raye û wayîrvejîyayîşê sindqan veng da.

Kaçmaze seba ke weçînitişê serekkomarîye tûrê diyînî rê mendo, no sey serkewtişê kurdan hesiban û nê vatî: “Ma sey Partîya Çep a Keske, HDP û DBPyî xebatanê weçînitişî rayra benê. Ma 28ê gulane de mabênê di kesan de nê mabênê rejîmî de do qerarê xo bidê. Coka berpirsîyarya ma est a. Zîndan  û surgunde hemrayê ma est ê. Ma cuye edil û demokratîke wazenê. Gerek ma hêvîya xo vînî mekerê, xo peyser meancê. Xora tradîsyonê têkoşînê ma zî werte de yo. Hêvî ma de ya, Ma gerek hayîyê hêzê xo bê. Gerek ma pêro şirê sindoqan ser,  wezîfeyê xo yê tarîxî bîyarê ca, raya xo bişuxulnê û wayîrê rayan û sindiqan bivejîyê. ”

Hemşaredarê Edremîtî Medenî Ozero ke herinda ci de qeyûm ame cakerdene, ey zî bale ante muhîmîya weçînitişî ser û vat: “Weçînitişê 28ê gulane semedê şaranê mazlûman ê Tirkîya têkoşînê estbîyayîş û çînbîyayîş o.  Nê semedî ra gerek her kes 14ê gulane ra dahîna qerardar şiro sindoqan ser û reya xo bişuxulno. Gerek her hes wayîrê raya xo bivejîyo. Wa her kes vera xîleyanê weçînitişî hîşyar bo. Ez bi xo weçînitişê 14ê gulane de bîya şahîd ke rayê Parîya Çep a Keske senî ameyî diznayene û MHPyî rê ameyî nuştene. Gerek ma goreyê nê hazîrîya xo bikerê û wayîrê sindoqan bivejîyê.“

Endamê Meclîsê Partîye yê HDPyî Şerîf Durmaz zî vat, “Şarê ma 14ê gulane de sindoq de îradeyê xo mojna ra la gureyê ma tîya nêqedîya.  Seba ke 28ê gulane de no rejîm bêro bedilnayene, Erdogan bêro şawitene gerek ma pêro wayîrê îradeyê xo bivejîyê. Gerek her kes embaz û cîranê ci ke nêşîyê sindoqî ser, înan îkna bikero. No weçînitiş semedê  welatî, semedê bedilnayîşî muhîm o. Ma wayîrê ameyoxê xo bivejîyê û pêro pîya nê rejîmî bibedilnê. Ma têna raya xo meşuxulnê, wayîrê sindoqan zî bivejîyê. Hêz û îradeyê ma est o. Paştîya  ma şarê ma ra pêt a. 28ê gulane do bibo roja bedilnayîşî.”