Walîyê Dêrsimî dima ke Mazgêrd zîyaret kerd qereqolanê dewanê Muxundî, Germîsî, Dirban û Faracî ra wendişê ezanî dest pêkerd.

Hetkarê Hemserekan ê Pêroyîyan û Wekîlê HDPyî yê Dêrsimî Alîcan Onluyî  mesele berde Meclîsî. Onluyî da zanayene ke Dêrsim de polîtîkayê asîmîlasyonî yê taybetî yenê caardene. Onluyî vat: ''Darbeya 12ê Êlule ra dima qereqalan ra wendişê ezanî dîyabi destpêkerdene. Mi rê dîya zanayene ke dima ke Walîyê Dêrsimî Mazgêrd zîyaret kerd qereqolan ra wendişê ezanî dest pêkerd. Dewanê elewîyan de wendişê ezanî hem elewîtîye rê hem zî ezanî rê bêhûrmetîya pîl a. Wendişê ezanî têna polîtîkaya asîmîlasyonî nê pê bawerîya elewîtîye yarîkerdiş o. Şarê Dêrsimî pê na rewşe raşta zî qayîl nîyo û nê kerdişî sey şîdetê psîkolojîkî vîneno.'' 

Onluyî Wezîrê Karanê Zereyî Suleyman Soyluyî rê nê persî pers kerdî: 

-Xebera şima pê esta ke dewanê Muxundî, Germîsî, Dirban û Faracî de qereqolan ra ezan yeno wendene? 

-Nê kerdişî senî dest pêkerd? 

-Dewanê elewîyan de wendişê ezanî elewîtîye rê bêhûrmetîye nîya? 

-Walîyê Dêrsimî zîyaretê xo ra pey no kerdiş waşto? Walîyî semedo ke dewê elewîyan bêbawerî dîyî wina kerdo? 

 -Şima do derheqê mesuldaranê nê kerdişî de tehqîqatêk bikerê? 

-Şima do Walîyê Dêrsimî Mehmet Alî Ozkan wezîfeyî ra bigêrê?