Doktor Neşet Dîhîle programêkê televîzyonî yê TEN TV’yî de çend belgeyê ke aîdê Teşkîlatê Îstîxbaratî yê MÎT’î yê dewleta Tirkî yê vila kerdî. Goreyê nê belgeyan hukmatê AKP’yî yo ke Erdogan serkêşîya ci keno pîya bi MÎT’î planê binfînayîşê heme hêzanê muxalifan ê hemverê Erdoganî keno ke bi taybetî hedef de Partîya Karkerên Kurdistan (PKK), endamê Partîya Demokratîke ya Şaran (HDP) û hêzê Rojava estê.

Goreyê belgeyo ke eşkera bîyo, AKP û MÎT pîya bi hawayêkê barîyî û bi dîqet planê kiştişê endamanê serkêşan ê PKK’yî, vetişê şaredarîyan destê Kurdan ra û kiştişê endamanê Partîya Demokratîke ya Şaran (HDP) kerdo.    

Dr. Neşet Dîhîleyî vat ke belgeyan de ameyo waştene ke partî û dezgeyê sîyasîyî yê Kurdan ê Vakûrê Sûrîyeyî bêrê tasfîyekerdene û hetê sîyasîyî ra bêrê zihîfkerdene. Heman wextî de seba bicaameyîşê nê zî budçeyêk amîya hadrekerdene.

Belge de yeno vatene, ganî leşkerê artêşa Tirkî hîna zaf bêrê perwerdekerdene ke bieşkê hemverê şerê gerîlayan de bieşkê vinderê.

Nuqteyêka bîne ya belgeyan a ke bale ancena na ya; ganî dadgehê leşkerîyî bêrê zêdekerdene û çi gama ke leşkerîe hêrişan ra remayî ganî heme mesuldar  û leşkerî bêrê cezakerdene. Ancî ganî rastameyîşê her çî û qewimîyayîşî de gule biteqno, heta eke îmkan çinbo zî gule biteqno. 

Dr. Dîhîleyî programê televîzyonî de babeta Rojava de zî nê vatî: “Goreyê nê belgeyanê ke ameyê eşkerakerdene, ganî şero taybet hemverê partî û sazîyanê Kurdan ê Rojavaya Kurdistanî de bêro rayraberdene. Heman wextî de medyaya Tirkan zî seba nê ameya hadrekerdene û bi taybetî zî televîzyonê dewlete TRT û Ajansê Anadoluyî sea nê ameyê wezîfedarkerdene. Do TRT û Anadolu şerê taybetî bi hawayêkê barîyî bikerê û do hîna vêşî hêz bidê leşkeranê Tirkan.”