Karasu: Semedê Şingalî statu mesuldarîya pêro merdimîye ya

Endamê Konseya Rayberdişî ya KCKyî Karasuyî ard ziwan ke merdimîye verê êzidîyan de wayîra mesuldarîyêk a û semedo ke verê hêrişanê dewleta tirke bêro girewtene gamî statuyê êzidîyan bişinasîyo, pê qanûnan bipawîyo.

Endamê Konseya Rayberdişî ya KCKyî Mustafa Karasuyî tewrê Bernameya Taybet a Medya Haber TVyî bi û rojdem ercna. Qiseykerdişê Karasuyî ra beşêk wina yo:

''Hemleya Wextê Azadîye serrêke xo pey de verdaye. Ma do çarçewa na hemle de do Rayber Apoyî azad bikerê û meseleya kurdan çareser bikerê. Têkoşînê vera dewleta tirke û îqtîdarê AKP-MHPyî dewam keno. Xoverdayîşê vera hêrişanê ke 23ê nîsane de dîyayê destpêkerdene zî parçeyêkê Hemleya Wextê Azadîye yo.

Tirkîya tim hêrişê Şingalî kena la PDK, hukmatê Iraqî, Neteweyê Yewbîyayeyî (NY) û Amerîka vera nê hêrişan bêveng ê. Tirkîya pê nê hêrişan armanc kenê ke Peymana 9ê Teşrîna Peyêne pê zorî êzidîyan rê bida şinasnayene. Cidî yo ke wexto ke Serekkomarê Iraqî Kazimî Şingal de bi Tirkîya hêrişê ci kerd. 

PDK êzidîyan semedo ke Rayber apoyî ra hes kenê set dişmenî vîneno û YBŞ nêşinasneno. PDK vano nê hêzî agêrayîşê êzidîyan asteng kenê. Înan Şingal azad kerd la çira bibê asteng? PDK pê vateyanê 'Semedo ke HPG, PKK Şingal de yê Tirkîya hêrişê Şingalî kena' êzidîyan keno hedef. PDK coka vera hêrişanê Tirkîya bêveng o. Merdimîye verê êzidîyan de wayîra mesuldarîyêk a û semedo ke verê hêrişanê dewleta tirke bêro girewtene gamî statuyê êzidîyan bişinasîyo, pê qanûnan bipawîyo. Êzidîyî zî ganî pê pêro hêzanê xo Şingal bipawê, yewîya xo bîyarê ca û cîyatîyanê zereyê xo bidê kişte.

Îqtîdarê AKP-MHPyî hem dişmenê kurdan o hem zî dişmenê hêzanê demokrasî yo. Semedê çinkerdişê faşîzmê AKP-MHPyî ganî kurdî zêdêr xîret bixebitê. Ganî kurdî vera hêrişan tewirêkê topyekûnî bimojnê, bi hawayêkê hemparî têbigêrê. Xora îqtîdar cara bîyo qels. Eke no îqtîdar şoro verê Rojawan, Başûr û Vakurê Kurdîstanî do abibo.

Amerîka bi xo Talîban aferna, Afganîstan îşxal kerd. Nika zî Talîban bi hêvîya cerganê cîhadîstan. AKP propagandaya Talîbanî keno. Erdogan û AKP cara cerganê sey DAÎŞ, El Nûsra û El Qaîdeyî weye kenê. Tirkîya wazena Talîban ra fayde bivîna, ey bişuxilna. Coka talîba pawitişê meydanê teyarayan ê Kabîlî ya. Hetê bînî ra Tirkîya multecîyan zî îstîsmar kena û vera Ewropa înan sey çeke xebitnena. Ganî kurdî meverdê ke nê multecîyî Kurdîstan de bêrê cakerdene. Ma vera multecîyan nîyê la afganî do bibê hacetê vurnayîşê demografîya Kurdîstanî. 

Eşkerayîya Esasî ya serê sîstemê îdareyî yê Sûrîye ma rê zaf pozîtîf ameye. Eke Sûrîye de îdareyê yewmerkezî bêro vurnayene meseleya Sûrîye zî çareser bena. Xora Îdareyo Xoser bi xo semedê nê sîstemî modelêk o. Ganî raştîya Sûrîye bêra dîyene; Sûrîye de komelê sey ereb, kurd, sûryanî ûsn estê. Ganî nê komelî bêrê yewca, pê bikerê. Ma hêvîdar ê ke do wina bo.''