Weçînayîşanê Tirkîya û Vakurê Kurdîstanî rê çend rojî mendî. Karkeranê înşaetî derheqê babete de ANFyî rê qisey kerd. Karkeranê înşaetî û endamanê Sendîkaya Karkeranê Rayîr û Înşaetî yê Şorişgêran pare kerd ke ê paştî danê Partîya Çep a Keske û pê bawer ê ke Meclîs de partîye biba vengê înan.

Karker Azad Karakuşo ke 18 serre yo û reya verêne do raye bido îfade kerd ke o neçare mendo ke dibistane war verdo û bixebito. Karakuşî vat: ''Teyna seba xo ney seba her kesî ez wazena hînî no sîstem bêro vurnayene. Seba ke siba heqê ma yê karkeranê înşaetî nêrê xespkerdene ez do paştî bida Partîya Çep a Keske.''

Yusuf Kento ke 10 serrî yo karê înşaetî keno û pêro pereyo ke qezenç keno keyeyê xo rê şaweno ard ziwan ke ê bi îmkananê kêman xebitîyenê, fîrmayî tim heqanê înan wenê la Partîya Çep a Keske do heqanê înan bipawa.

Karkerêkê bînî yê înşaetî Kerîm Înceyî pare kerd ke ê teyna wazenê ke meseleyê Tirkîya çareser bibê û vat: ''Ez pê bawer a ke Partîya Çep a Keske seba çareserîya meseleyan bixebita. Coka ez do raya xo bida ci.''

Tarik Karulî vat: ''8 serrî yo ez sektorê înşaetî de xebitîyena. Heqê ma yenê xespkerdene, ma barakayan de manenê. Ê xîret kenê ke verê HDPyî bigêrê. La îqtîdar se keno wa bikero ma do têkoşînî ra fek vera medê. Ma hetê Partîya Çep a Keske de yê.''

Temsîlkarê Dev Yapi-Îşî Osman Uneyî bale ante ser ke karkerê înşaetî paştî danê Partîya Çep a Keske çunke Partîya Çep a Keske hetê înan de ya. Uneyî vat: ''Ma wazenê ke sey merdiman biciwîyê. Karkerê ke verê cû raye dayêne partîyanê bînan nika do raya xo bidê Partîya Çep a Keske.''