Wekîlê HDPyî yê Îstanbulî Erol Katirciogluyî vist vîrî ke ekonomîya Tirkîya serra 2020î ra nata vinderte ya û îfade kerd ke bingeyê nê krîzî jan nîyo.

Katirciogluyî ANFyî reyde qisey kerd û ard ziwan ke sebebê krîzî no yo ke îqtîdar nêeşkeno ekonomî îdare bikero. Katirciogluyî bale ante nê di sebebanê bingeyîyan ser ke hukmat bi ekonomî bi hawayêkê xirabî îdare keno:

-Mîyanê xo de demokrasî ra dûrî keweno.

-Polîtîkaya teberî de kewt mîyanê têgêrayîşanê emperyalîstan.

Katirciogluyî vat: ''Îqtîdar herinda ke xo bido çareserîya meseleya kurdan ser agêrayo polîtîkaya şîdetî ser. Eke welatêk de demokrasî çinbe ekonomî zî ser nêkewena. Reyna eke têkilîya şima cîrananê şima reyde hol nîya ekonomîya şima bin kewena. 2008î ra dima polîtîkayanê Anqara kerd ke krîz do bibo giranêr. Îqtîdar keno ke krîz mîyan bikero la hînî nêeşkeno.''
 

Katirciogluyî eşkera kerd ke krîz bi taybetî şaristananê kurdan de tesîrê xo mojneno û vat: ''Herême de se ra 80 şîrketî ya bi temamî qefilîyayî yan zî seba wextêk qefilîyayî. Na hûmare bi xo mojnena ke no krîz çendek pîl o.''