Komeleya Kultur, Hetkarî û Averberdişî ya Gêxî, Depe, Azarpêr, Xorxol û Çêrme (KAYY-DER) Îskeleyê Rihtimî yê qezaya Kadikoyî yê Îstanbulî de derheqê şewatê Dara Hênî û talanê xozaya Çewlîgî de eşkerayîyêke daye.

Eşkerayîye de pankarta bi nuşteyê 'Vera talan û şewatê Çewlîgî ma xoza pawenê' ameye akerdene û sloganê 'Destê xo mede xoza' ame vatene. Wekîlê HDPyî Musa Pîroglu zî tewrê eşkerayîye bi.

Hemsereka KAYY-DERî Yelîze Vergîlî îfade kerd ke şewatê daristanan guleyanê qereqolê Dara Hênî ra semed qewimîya û ci rê mudaxele nêno kerdene. Vergîlî vat: ''Gereka ma bi hawayêkê komkî verê na mesele de hîsger têbigêrê û qîmet bidê xozaya xo. Çira seba şewatê Marmarîsî 10 helîkopterî erşawîyayî la seba Çewlîgî çîyêk nêame kerdene?''

Wekîlê HDPyî Musa Pîrogluyî zî pare kerd ke şaristanê Kurdîstanî pê bombayan yenê vêşnayene û vat: ''Şewatê Çewlîgî asta nê şerî eşkera keno. Êyê ke seba Marmarîs, Îkîzdere û Kanal Îstanbulî wurzenê payan ser seba Cûdî, Heskîf û Çewlîgî bêveng ê. Ma do înanê ke no şewat vet ra hesab bipersê. Nê pêro şewatan ra îqtîdar bi xo mesuldar o.''