Kongreya Cimatê Demokratîkî (KCD) serrgêra Qirkerdişê Helebçe de eşkerayîyêka nûştekîye daye. KCD’yî vist vîrî ke Qirkerdişê Helebçe verê 31 serrî sey perçeyêkê qirkerdişê Enfalî bi fermanê Sedam Huseynî hemverê Kurdan de ame kerdene.

 ‘ŞARÊ KURDÎ HEMVERÊ QIRKERDIŞAN DE GAME APEY NÊEŞTA’

KCD'yî qirkerdişê serê Kurdan ê 12'ê Adar e Qamişlo, 28'ê Kanûn a Roboskê, 3'yê Tebaxe ya Şengalî, dima ra Cizîr, Silopî, Sûr, Nisêbîn, Kerrboran, Gever û bajaranê bînan ê Kurdistanî ardî vîrî û vat ke nê qirkerdişî eşkera yê, sûcê hemverê merdimîye yê û bi paştîdayîşê dewletanê kolonyalîst û emperyalan virazîyayê.

KCD’yî vat ke şarê Kurdî yo ke çar perçeyan de yo hemverê qirkerdişan de gamêk zî apey nêeşta û resayo a merhele ke bi hêz û îradeyê xo hesab biperso û nimûneyê Qamişlo û Şengalî da û vat, “Hemverê qirkerdişê Qamişlo de şarê ma yê Rojawanî, Kurdê Êzîdîyan zî hemverê qirkerdişê Şengalî de bi awankerdişê xopawitişî cewab da qirkerdişan.”

Heman wextî de KCD’yî vat, “Rayîro tekane yo ke şaran û merdimîye virazeno hêzê înan ê ogranîzekerdişî, demokratîkbîyayîş û yewî ya. Seba ke şarê ma no bica ardo heqê heme çetinîyan de vejîyayo, xo dayo xoverdayîşêk ke tim pîl û xurt beno.” KCD’yî peynî de vat Kurdî do nêverdê ke reyna qirkerdişî serê înan de bêrê kerdene.