KCDK-E: Roja Haştîye ya Dinya de Kurdîstanî bipawê
KCDK-E venga pêro kurdîstanijan û dostanê înan da ke vera hêrişanê dewleta tirke ya îşxalkere 1ê Êlûle Roja Haştîye ya Dinya de verê Parlamentoyê Ewropa de tewrê çalakîya roniştişî bibê.
Dîwanê Hemserekîya KCDK-E bi wesîleya 1ê Êlule Roja Haştîye ya Dinya eşkerayîyêke daye û semedê beşdarîya çalakîya roniştişî veng da.
KCDK-E eşkerayîya xo de îfade kerd ke Tirkîya verê çimanê Neteweyan ê Yewbîyayeyan û pêro dinya de hêrişê kurdan kena, Şingal û Rojawan dayî bombayan ver, 10 merdimî qetil kerdî. KCDK-E vat Tirkîya bêvengîya Ewropa û NYyî ra cesaret gêna.
KCDK-E peynîya eşkerayîya xo de venga pêro kurdîstanijan û dostanê înan da ke vera hêrişanê dewleta tirke ya îşxalkere 1ê Êlûle Roja Haştîye ya Dinya de verê Parlamentoyê Ewropa yo ke paytextê Belçîka Bruksel de yo de tewrê çalakîya roniştişî bibê. Çalakîya roniştişî do pê şîarê 'Vera îşxalê dewleta tirke Kurdîstanî bipawê' bêra kerdene.
Adresê çalakîye (Parlamentoya Ewropa) wina yo: Place du Luxembourg 1050 Brussels, Belgium.
