Vizêr dewleta tirke ya îşxalkere pê droneyê çekdarî Hemsereka Kantonê Qamişloyî Yûsra Derwêş, hetkara ci Lîmane Şiwêş û ramitoxê wesayîtê înan Firat Tûma qetil kerdbî. 

Kongreya Komelê Demokratîkî (KCD) bi eşkerayîyêka nuştekîye hêriş şermezar kerd. KCDyî eşkerayîya xo de pare kerd ke rejîmê AKP-MHPyî yê faşîstî hêrişanê xo yê vera kurdan de qet yew krîterî nêşinasneno, sûcê vera merdimatîye keno. KCDyî ard ziwan ke Neteweyê Yewbîyayeyî, dezgeh û rêxistinê mîyanneteweyî bi bêvengîya xo paştî danê nê hêrişan. KCDyî îfade kerd ke AKP-MHP seba ke kurdî nêbê wayîrê statuyî hêrişê Rojawanî keno coka ganî pêro kurdî destkewteyanê xo bipawê.

KCDyî vat: ''Ma qetilkerdişê Yûsra Derwêş, Lîmane Şiwêş û Firat Tûmayî şermezar kenê. Ma venga pêro partî, dezgeh û rêxistinanê kurdan danê ke vera nê hêrişan tewirêkê zelalî bimojnê û destkewteyanê xo bipawê. Ma venga dezgehan û rêxistinanê mîyanneteweyîyan danê ke vera nê hêrişan mesuldarîyanê xo bîyarê ca.''