Konseya Rayberdişî ya KCKyî bi wesîleya serrgêra 30. ya Qirkerdişê Madimakî eşkerayîyêke daye û qurbanê Qirkerdişê Madimakî yê 2yê Temmuze yad kerdî.

Eşkerayîye wina ya:

''2yê temmuza 1993yî de Otêla Madimakî ya Sêwasî de netîceya hêrişêkê namerdî de komelê elewîyan ra roşnvîr, nuştox, rojnameger û hunermendî zî tede 34 kesî ameyî qetilkerdene. Ma nê qirkerdişî bi nefretî şermezar kenê. Ma şexsê qurbananê Madimakî de pêro şehîdanê demokrasî û şorişî bi rêz û minetî yad kenê. Ma ancî soz danê înan. Şarê ma do ferasetê qirkerî ra qetî hesab bipersê û ameyoxê azad û roşnîyî awan bikerê.

Dewleta tirke ya qirkere û tekpereste sere de elewî û kurdî pêro şaran rê dişmenîye kerde û kerd ke pê metodê qirkerdiş û kiştişî şaran çin bikera. Qirkerdişê Sêwasî (Madimakî) zî bi nê armancî ame kerdene ke no qirkerdiş dewamê Qirkerdişê Dêrsim, Mereş û Çorumî yo.

Elewîyî wayîrê bawerîyêka winayên ê ke tede cuyêka komunale, demokratîke, azade û komelkîye est a coka elewîyî tim bîyî hedefê îqtîdar û saltanatan û ameyî qirkerdene. Qirkerdişê vera elewîyan prosesê netewe-dewlete de hîna zaf zêdîyayî. Dewlete seba ke wayîra ferasetê tekperest, qirkere û serdest a tim elewîyî xo rê sey tehlukeyî dîyî û waşt ke elewîyan çin bikera. No nêzdîbîyayîşê dewlete rîyê ci yê qirkerî zî eşkera keno.

Dewleta tirke Vakurê Kurdîstan û Tirkîya de pê metodanê qirkerdiş, teda û kiştişî eşkena payan ser de vindera. Qirkerdişê vera elewîyan mojnenê ke dewlete teyna dişmena kurdan ney dişmena elewîyan a zî. Vera nê qirkerdiş û hêrişanê dewlete ma neçare yê ke têkoşînê hemparî bikerê. Çunke dewlete wazena ke bi nê qirkerdişan sîstemê xo yê tekperest, faşîst û kanwazî bipawa. Sêwas de zî wina bi. Dewlete Sêwas de roşnvîr, nuştox û hunermendê elewîyî qetil kerdî û waşt ke verê têkoşînê demokratîkî bigêra.

Qirkerdişê Sêwasî sey ê bînan hetê dewlete û hêzanê dewlete ra ame kerdene. Coka kiştoxî ameyî pawitene û wayîrê qirkerdişî ame vejîyayene. Reyna bi nê qirkerdişî ame armanckerdene ke hêzê şorişgêrî yê Kurdîstanî û ê Tirkîya nêrê yewca. Kurdîstan de o çax têkoşînê ma bîyêne têgêrayîşê şarî û hînî tesîrê têkoşînê Tirkîya zî kerdêne. Bi Qirkerdişê Sêwasî dewlete kerd ke vera yewîya nê wird têkoşînan bigêra. Kurdî û elewîyî dînamîkê demokratîkbîyayîşê Tirkîya yê. Dewlete waşt ke pê nê qirkerdişan verê nê wird dînamîkan bigêra.

Têgêrayîşê ma seba azadîya kurdan, elewîyan, cinîyan, bindestan û pêro şaran xîret keno. Rayber Apoyî zî seba ke elewîyî bi nasnameyê xo yê azadî biciwîyê zaf têkoşîn kerd. Rayber Apoyî xo rê erkê exlaqî û şorişgêrî dîyî ke kultur, bawerî û nasnameyê elewîyan bipawo. Nê xîretê Rayber Apoyî têgêrayîşê ma de zî karakterê demokratîkbîyayîşî xorin kerd.

Ewro Îqtîdarê AKP-MHPyî yo faşîst temsîlkarîya sîyaset û ferasetê qirkerî keno û vera kurdan, elewîyan, cinîyan, kedkaran, hunermend û roşnvîran  polîtîkayanê qirkerdişî ano ca. Ganî tecrîdê Îmraliyî, şerê vera kurdan, teda û hêrişê vera elewîyan, qirkerdişê cinîyan û talankerdişê keda karkeran sey qirkerdişan bêrê ercnayene. Vera nê qirkerdişan tewiro tewr raşt no yo ke hêzê azadîgîr û demokrasî wa yewîya xo pîlêr bikerê û têkoşînê demokratîkî aver berê.

Ma ancî îfade kenê ke hêzê azadîye û demokrasî ganî yewîya xo hîna bihêz bikerê. Feraseto qirker ancax bi nê hawayî bin keweno û hesabê qirkerdişan persîyeno. Bi nê bawerî ma reyna şehîdanê Qirkerdişê Sêwasî yad kenê. Vîrameyîşê şehîdan têkoşînê ma de tim biciwîyo û rayîrê ma roşnî bikero.''