Hemserekîya Konseya Rayberdişî ya KCKyî derheqê hêrişanê dewleta tirke yê vera Rojawanî de eşkerayîya nuştekîye daye û nê pare kerdî:

“Seke yeno zanayene dewleta tirke ya îşxalkere 7ê hezîrane 2023yî ra nata bi çekanê giranan hêrişê Rojawanî kenê. Netîceya nê hêrişan de xeylêk sîvîlan û şervanan dinyaya xo bedilnaye. Tay hêzê pabesteyê Sûrîye û leşkere Rûsya zî raştê hêrişê dewleta tirke ameyî. Ma nê hêrişan şermezar kenê û veng danê ke wa her kes vera nê hêrişan bivejîyo. 

Dewleta tirke dişmenê kurdan û demokrasîyî ya. Wazena kurdan çîn bikero. Hêrişê ci yê vera Rojawan û Sûrîye zî na çarçewe de yê. Bêşik şarê kurdî dewleta tirke hole sarisneno. Xora hêz û dewletê mîyanneteweyî zî dewleta tirke zaf hole zanê la semedê menfeatê xo bêveng manenê.

Dewleta tirke eşkera wazena ke sîstemê demokratîkî yê Rojawanî werte ra wedaro. Seba ke nê sîstemî de sey şaranê bînan kurdî zî wayîrê îradeyî yê wazena nê sîstemî weşano. Senî ke îşxalê vera Efrîn, Girê Sipî û Serêkanîyê de ame vînayene dewleta tirke têna îşxal nêkena, demografîya ci bedilnena. Kurdan erdê ci ra vejena. Wazena ke Rojawanî bikero bêkurd. Dewleta tirke nika wazena herêmanê bînan ê Rojawanî îşxal bikero. Dewleta tirke qirkerdiş kena ke no sûcê tewr gird ê merdimîye yo. Gerek Sûrîye û hêzê paştgêrê ci vera îşxalê dewleta tirke bivejîyê. 

Tay kurdê xayînî paştî danê dewleta tirke. Xora dewleta tirke tim wextê qirkerdişî de tay kurdanê xayînan gena cayê xo. Tarîx de xoverdayîşê kurdan ê vera înkar û îmhayî tim rîyê nê xayînan ra bin kewtî. Nika zî dewleta tirke tay kurdê xayînî yê bêrumetî girewtî cayê xo ke serê qirkerdişan binimno. La dewleta tirke nika se kena wa bikero, nêeşkeno raştîya xo binimno. Çunke şarê kurdî hinî zaneye yo û wayîrê îradeyî yo.

Çi heyf ke dewleta tirke planê xo yê qirkerdişî verê çimanê dinya ana caardene la qet çewî ra veng nêvejîyeno. Erdogano dişmenê kurdan planê xo yê qirkerdişê kurdan kombîyayîşê Neteweyanê Yewbîyayeyan de eşkera kerdî û çew vera nê planî nêvejîya. Çîyo winayên nîno qebulkerdene. Kurdan vera DAÎŞî şer kerd û no wehşet vindarna. Têna xo nê heme dinya pawit. Gerek şar şiro dewletan ser ke wa paştî medê polîtîkayanê qirkerdişî yê dewleta tirke.

AKP-MHPyî Kurdîstan de bi xayînan û hêzanê kontrayan îtîfaq kerd û kewt weçînitiş. Seba ke polîtîkayanê xo yê qirkerdişî dahîna xorî bikero hukmat de tay kurdê xayînî ca kerdî. Hukmato newe semedê qirkerdişê kurdan sey hukmatê şerê taybetî ame ronayene. Kurdan xora eşkera no rejîmo faşîst û sîstem red kerd. No rejîm têna qirkerdişê kurdan wazeno. Hêrişê vera Rojawanî leteyêkê nê yê. Gerek kurdî û dostê înan na raştîye dahîna rind bivînê û vera nê hêrişan nêrazîbîyayîşê xo xurtêr ramojnê û wayîrê Şorişê Rojawanî bivejîyê. Gerek şarê ma erdê xo cameverdo. Gerek vera hêrişan xoverdayîşo topyekûn bêro dayene.”