Koordînasyonê KJKyî û Konseya Hemserekîye ya KCKyî mesajî şawitî mîtîngê Kolnî û veng da ke seba azadîya Rayberê Şarê Kurdî Abdullah Ocalanî wa têkoşîn bêro pîlkerdene.

Mesajê KJKyî wina yo: ''Ma çalakîya şima selam kenê! Komployê 15ê Sibate 25 serrî xo pey de verdayî. Ma soz danê ke serra 26ine ya komployî de têkoşînê xo yê azadîye û xoverdayîşê xo pîlêr bikerê. Ma hêzanê komplogeran şermezar kenê û xoverdayîşê Îmraliyî yê Rayber Apoyî selam kenê. Rayber Apoyî bi paradîgmaya xo ya Modernîteya Demokratîke nîşan kerd ke şorişê cinîyan û ekolojî do komelê demokratîkî mumkîn bikero. Rayber Apoyî bi paradîgmaya xo hêzê komplogerî muhakeme û mehkum kerdî. Rayber Apoyî bi xoverdayîş û têkoşînê xo sîstemê Zîndanê Îmraliyî pûç kerd. Paradîgmaya Rayber Apoyî pêl bi pêlî bîya berê azadîya cinîyan û sîstemê serdestîya camêrdan şikna. Cinîyî ganî bizanê ke komplo û tecrîd vera înan zî yenê kerdene û bi nê zanayîşî seba azadîya Rayber Apoyî tewrê têkoşînî binê, bi ruhê seferberî xo rêxistin bikerê. Bi na wesîle ma sere de cinî û ciwanan venga pêro şarê ma, rayaumûmîya demokratîke û dostanê xo danê ke beranê Îmraliyî birijnê, seba ke azadîya Rayber Apoyî bîyarê ca  bi ruhê seferberî têkoşînê xo biresnê asta leweyî. Rayberîya Azade reyde cuya azade her wextî ra zafêr nêzdî ya!''

Mesajê KCKyî wina yo: ''No rayraşîyayîş û mîtîngê şima komplogeran rê cewabo tewr pîl o. 25 serrî verî hêzanê komplogeran bi kayan û xîleyan Rayber Apo teslîmê dewleta tirke kerdbî. Armancê înan tasfîyeya têgêrayîşê azadîye bibi. La ê nêresayî armancanê xo. Rayber Apoyî zîndan de xo ver da û Îmrali vurna warê xoverdayîşî. Şarê ma û têgêrayîşê ma zî komplo pûç kerd. La komplogeran hema zî armancanê xo ra  fek vera nêda coka ê her ca de hêrişê kurdan kenê. Rayber Apoyî û hîrê embazanê ma yê bînan ra 35 mengan ra nata xeberêke nêameya girewtene. Seke zanîyeno dostanê ma teşrîna verêne de Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' dabî destpêkerdene. Ma bi pêro hêzê xo na hemle de cagênê. Ma pê bawer ê ke do tecrîdî bişiknê û Rayber Apoyî azad bikerê. Ma venga dewleta Almanya danê ke dewleta tirke rê hemkarîye nêkera. Na çalakîya şima zî hêz dana Hemleya Azadîye. Ma venga pêro kurdîstanijan û dostanê xo danê ke na hemle bi çalakîyanê xo hîna xurt bikerê. Azadîya Rayber Apoyî do biba azadîya şarê Kurdîstanî û ê ma.''