Komîteya Perwerdeyî ya KCKyî bi wesîleya Roja Ziwanê Dayîke ya Dinya eşkerayîya nuştekîye daye û nê pare kerdî:

''Her ziwan vîr û kiriştoxê  tarîx, kultur, edebîyat, huner, sîyaset û felsefeya cuye yê komelê xo yo. Ma sey şarê ke têkoşînê estbîyayîş û azadîye rayra benê û sey hêzê ci yê rêxistinkerdeyî  çirey ziwan têna sey hacetê resnayîşî nêvînenê. Bi wayîrvejîyayîşê ziwanî ma eşkenê komelbîyayîşê xo aver berê. Ma ziwan sey mewzîyêka têkoşîn û xoverdayîşî ya esasî vînenê ke bi na mewzî ma eşkenê komelbîyayîşî xurtêr bikerê, kulturê xo bidê ciwîyayene, nasnameyê xo bikirişê sibayan û estbîyayîşê xo bipawê.

Bi des hezaran serî verî herra Kurdîstanî de serkêşîya cinîyan de şorişê ziwanî ame kerdene ke verê merdimîye akerd, ewro dewletê serdestî eynî herre de qirkerdişê ziwan û kulturî kenê  û ziwanê şarê qedexe kenê. Perwerdeyê yew ziwanî her warê cuye de ameyo ferzkerdene.

Însanê ma seba ke ziwanê kurdkî de perwerde dayo ameyî hepskerdene, seba ke deyîrê kurdkî vatî ameyî qetilkerdene, dezgehê ziwan û kurlturî yê ke şertenê zehmetan de ameyî akerdene, ameyî qefilnayene, zîndanan de însanê ma nêeşkenê bi ziwanê dayîke xo bipawê, sey 'ziwanê ke nîno zanayene' ame astengkerdene û seba ke bi deyîranê kurdkî govende girewte derheqê înan de fezlekeyî ameyî hazirkerdene.

Dewleta tirke ya ke perwerdeyê kurdkî qedexe kena Efrîn, Serêkanî û Girêspî yê ke îşxal kerdî, tîya de zî verê çimanê dinya de vera domananê kurdan û ereban polîtîkaya qirkerdişê ziwan û kulturî rayra bena. Hema  çend rojî verî Îstanbul de kayê tîyatroyî yo kurdkî ame qedexekerdene, roja bîne seba ke dayîkêka kurde tirkî nêzana bi saetan meydanê teyarayan ê Îstanbulî de rehîn ameye girewtene. 

Rojhelat de zî hetê dewleta Îranî ra sey Seywan Îbrahîmî û Zara Muhammedî xeylêk mamosteyî raştê cezaya hepsî ameyî. Başûr de zî destkewteyo tewr pîl ke bi bedelanê pîlan ame destfînayene perwerdeyê ziwanê dayîke bi la ewro warê parwerdeyî mabênê partîyan de bîyo sey arenaya pêkewtişan. Xora PDKyo ke serrgêra 100.  ya komare de merkezê Hewlêrî de pasta birna, tira nîno pawitene ke semedê ziwanê dayîke çîyêk bikero. Başûr de ganî semedê perwerdeyî çalakîyê radîkalî bêrê kerdene.

Wa mero vîrakerdene ke na dewlete TRT6 akerd ke kurdan rê bi kurdkî heqaret bikero û kurdan rê kurdkî propaganda bikero. Heqê perwerdeyê ziwanê dayîke sey dersa vîjnayîye dayîş dewamê polîtîkaya qirkerdişê vera kurdan o. Paştgêrê na polîtîkaya qirkere zî Rudawê PDKyî yo ke Başûr pêşkeşê dewleta tirke kerdo û Hudapar ê. Wa no zaf hol bêro zanayene ke Başûr de PDK çîyo, Vakur de  zî Hudapar zî eynî yo. Nê wirdî zî xizmetkarê dewlete yê.

Hudapar kuçeyê ke vizêr tede kurdî qetil kerdêne ewro tede qala dersa vîjnayîye kena. Wa hudaprijî bizanê ke kurdî xo vîra nêkenê. Kurdî ne hole ne zî xirabîya ke  înan rê bîyî xo vîra nêkenê. Tarîx çirey xo vîra nêkeno û ef nêkeno.

Na na nuqta de modelê perwerdeyî  yê Rojawanî  herême û dinya de semedê şaranê ke têkoşînê estbîyayîş, nasname û ziwanî danê bi nimûneya hêz û îradeyê xoserî. Rojawanî bi sîstemê perwerdeyî mojna ke şarê cîya cîyayî eşkenê pîya bi zaf ziwanan û kulturan biciwîyê. Îdareyo Xoser ê Rojawanî ganî nê sîstemê zafziwanî xurtêr bikero.

Ma reyna bi wesîleya roja ziwanê dayîke vanê ganî têkoşînê wayîrvejîyayîşê ziwanê dayîke, estbîyayîş û nasnameyî bêro xurtkerdene. Waştişê perwerdeyê ziwanê dayîke heme waştişanê bînan ra zafêr meşrû yo. Ganî şarê ma welat û teberê welatî de ça beno wa bibo bi ziwanê xo qisey bikero û seba ke verê perwerdeyê ziwanê dayîke bêro akerdene têkoşîn bikero. Vera polîtîkayanê asîmîlasyonî ganî têkoşîn bêro xurtkerdene.''