KCK’yî bi yew beyanato nuştekî, Qazî Muhammed û embazê ey ê ke 73 serrî naye ra ver Mehabad de ameybî îdamkerdene yad kerdî. Beyanatê KCK’yî de ame vatene ke Komara Mehabadî, rayîrê mucadeleyan ê xo ra pey kerdê roşnîye û seba Kurdan derse muhîmî daye.

KCK’yî beyanatê xo de wina va:

“Komara Kurdî ya merkezê Mehabadî ya ke bi serkêşîya Qazî Muhammedî ameyebî awankerdene, tarîxê Kurdan de wayîrê cayêko muhîmî ya. Kurdan de derheqê ferasetê neteweyîye de tesîrêko pîl dayo gire û rayîrê tarîxê mucadeleyê Kurdan kerdo roşnîye. Komarê Kurdan ê Mehabadî zî sey xoverdayîşanê Şêx Seîd û Seyît Rizayî bîyî qurbanê nîzamê Rojakewtena Mîyanêne yê seserra 20’an. Sîyasetê Seserra 20’an bi bingehê qirkerdişê Kurdan ameyo ronayene û rijnayîşê Komara Kurdan a Mehabadî rê zî bin o qeyde bingeh ameyo viraştene. Ronayoxê nîzamê Rojakewtena Mîyanêne yê seserra 20’an Îngilîstan o û Îngilîstanî hemverê Kurdan de paştdarîye daya rejîmê Îranî û rijnayîşê Komarê Kurdan de rol girewto.

Xoverdayîş û cehdê Qazî Muhammet û embazanê ey tal û betal nêşî û mucadeleyê înan seba mucadele û xoverdayîşanê neweyan bi roşnî û rayîr akerd. Ewro Kurdî Rojakewtena Mîyanêne de bîyê aktorê sîyasetî yê tewr muhîmî û pêroyê dinyaye de û çar parçe Kurdistanî de qehremanê sey Qazî Muhammedî afernayê. Ewro Çar parçe Kurdistan de mucadeleyê Qazî Muhammed û embazanê ey yeno domnayene û hêxê xoverdayîşî ameyo afernayene.

Qazî Muhammed û embazanê ey waşto ke zereyê sînoranê Îranî de Kurdistanê Azadî awan bikerê. Seba ke Îran de zîhnîyeto demokratik û îqtîdaro demokratik çin bîyo, waştişê înan bi teda û îdam ameyo wedaritene. La zîhnîyeto demokratik ke bibîyêne, înan do fehm bikerdêne ke bi waştişê înan do Îran hîna bibîyêne bi hêz.  Ewro projeyê Qazî Muhammedî hem seba demokrasîyê Îranî, hem zî seba hêvîyê Kurdan sey projeyê tewr başî yenê dîyayene û nê projeyi ganî bêrê rojanekerdene. Ganî nêro xo vîr ra kerdene ke rayîrê yewbîyayîya Îranî, bi azadîya Kurdan mumkon a.

Seba Îranî, seba Kurdan zî rayîro tewr rast no yo û ewro no hîna baş yeno fehmkerdene. Bi wesîlaya seserra 74’ine ya îdamkerdişê Qazî Muhammed û embazanê ey, ma venga rejîmê Îranî dane û vanê derheqê problemê Kurdan de ganî gaman bierzo û no hem seba demokratîkbîyayîşê Îranî, hem zî seba heqanê Kurdan şert o.’’