Hemserekîya Konseya Rayberdişî ya KCKyî derheqê hêrişanê vera multeceyan de yê ke Kayserî de ameyî  destpêkerdene û bajaranê bînan de vila bi,yî eşkerayîye daye û nê vatî:

''Çend rojî yo Tirkîya de vera multecîyan ê sûrîyeyijan hêrişî yenê kerdene, şarê sûrîyeyijî yenê hedefgirewtene û pirodayene, keye, cayê karî yê multecîyan yenê sereştene û dîyenê adirî ver. Ma nê hêrişanê faşîst û nîjadperestan ê  ke bi destê dewlete yenê kerdene, şermezar kenê. Ganî helêke cuewa ver verê  na rewşa bêro girewtene. Ganî vera kayanê rejîmê nîjadperest, faşîst û komplokerî yê AKP-MHPyî her kes hîşyar bo, kayanê ci rê mexapîyo. Îqtîdar peyê kayanê leyminan de yo. Keno ke şaran biverdo pê û waştişanê xo bîyaro ca. Nê hêrişî kayêkê îqtîdarî yê. Ma veng danê ke wa her kes hîşyar bo mexapîyo.

Kaosê Sûrîye de rolê rejîmê faşîstî yê AKP-MHPyî gird o. Averberdişê şerî rê serkêşîye kerd û bi hewayêkê plankerdeyî bi mîlyonan sûrîyeyijî antî Tirkîya. Bi polîtîkaya xo ya multeceyan bi serran o Ewropa  tehdît kena û çeteyanê ke weye kena bi înan vera kurdan û şaranê Sûrîye şerê îşxal û qirkerdişî rayra bena. Rejîmo faşîst seba ke vakurê Sûrîye îşxal bikero çîyo ke destê ci ra yeno keno ke  wa şerê Sûrîye xorîn bibo. Çeteyê wehşîyî kerdî weye, paştî daye ci, kerdî wayîrê pere û çeke û verdayî şaran. Qirkerdişî kerdî. Gama ke çeteyan qîm nêkerd, bi xo dest pê hêrişî kerd, herra Rojawan û Sûrîye îşxal kerd, demokrafî bedilna, merdimî qetil kerdî, şar cayê ci ra kerd, perîşan kerd. Cayanê îşxalkerdeyan de merg, îşkence û tecawuz û her qeyde wehşet kerd leteyêkê cuye. Îtîdaro faşîst wazeno semedê plananê xo yê leyminan Tirkîya de zî wina bikero.

Nêzdîbîyayîşê îqtîdarî yê vera multecîyan ê sûrîyeyijan çarçewaya nê polîtîkaya leymine de yo. Tayyip Erdogan û AKP şarê erebî, sûrîyeyîjan ra hes nêkeno. No xapînayîş o. Waştişê ey têna oyo ke şarê erebî bikerê dişmenê kurdan, ereban û kurdan biverdo pê û îqtîdarê xo payra biverdo. Hêrişê vera multecîyan ê ke Tirkîya yenê kerdene netîceya polîtîkaya dişmenîye ya îqtîdarî ya. Ma sey şaran eşkenê pîya bi ciwîyê, ma eşkenê newera cuye  înşa bikerê. Sey Têgêrayîşê Azadîye yê Kurdîstanî waştişê ma no yo. Şarê kurdî zî wina wazeno, heme şaran sey wayûbirayî vîneno. Paradîgmaya netewa demokratîke ya Rayber  Apoyî garantîye pîyaciwîyayîşê şaran a. Na paradîgma rayîro tewr raşt û erjîyaye yê çareserkerdişê probleman a. Ma reyne hêrişanê nîjadperestan şermezar kenê û veng danê ke sere de şarê erebî wa paştî bidîyo heme şaranê Sûrîye û vera nê hêrişanê nîjadperestan bêro vejîyayenê.''