Komîteya Şaran û Baweriyan a KCKyî bi wesîleya destpêkerdişê Rojeyê Muharemî eşkerayîye daye. Eşkerayîye wina ya:

''Rojeyê Muharremî yo ke tede xoverdayîşê Kerbelayî bi îbadetî yeno yadkerdene, dest pêkerd. Elewîyî û şîîyî na aşme de bi rojeyî Hz. Huseyînî û têkoşînê ci yê edaletî yad kenê. Ma nê xoverdayîşî selam kenê û şehîdê nê xoverdayîşî yad kenê. Ma hêvî kenê ke roje û loqmayê şîî û elewîyan qebul bibê.

Hz. Huseyîn û şexsê ey de pêro şehîdê Kerbelayî tim vîrardişî heq kenê. Çunke ê şexsê şaranê Rojhelatê Mîyanênî de perwerîya bi heq û edaletî, îlhamê xoverdayîşî û ferasetê azadîye îfade kenê. Kesê wayîrwijdanî ganî vera neheqîya ke Kerbela de qewimîyaya vejîyê. No heman wextî de nimûneyê vervejîyayîşê hêzanê îqtîdarî yo. Xoverdayîşê Kerbelayî yê Hz. Huseyîn û hemrayanê ey tewirê heq û heqîqatî yê vera zulm, teda û îşkenceyî temsîl keno û no tewir Rojhelatê Mîyanênî de bîyo îfadeyê ruhê azadîye yo tarîxî. Coka ewro vera Yezîtanê modernan vejîyayîş yeno manaya vîrardişê Hz. Huseyîn û hemrayanê ci.

Hz. Huseyîn nasname û xetêk o ke elewîtîye de xoverdayîşî temsîl keno û vera zaliman têkoşînê heqî dano. Ewro her wextî ra zafêr ma hewceyê na xet ê ke elewîyî bi îbadet, roje û germîya îmaman danê ciwîyayene. Xoverdayîşê Kerbelayî û tewirê Hz. Huseyînî ewro hîna zaf venga elewîyan danê ke bibê Huseyînî. Ma zî venga elewîyan danê ke vera zaliman hîna zixmî vinderê û hîna zaf yewîya xo awan bikerê. Elewîyî eşkenê bi yewbîyayîşî heqê Yezîtanê nê çaxî ra bêrê. Coka ewro Muharremî pêro elewîyan rê emr keno ke vera faşîzmê Erdogan-Bahçelîyî bi yewî û hetê hêzanê demokrasî de têkoşînê hemparî bikerê. Xoverdayîşê vera Yezîtanê sey Erdoganî erkê her Huseynîyî yo.

Ganê ma yê ercîyayeyî;

Ma sey elewîyan emser de Rojeyê Muharemî bi têkoşînê vera Yezîtan pêşwazî kenê. Bi taybetî Kurdîstan û Tirkîya de elewîyî binê asîmîlasyon, qirkerdiş, teda û îşkenceyan de kenê ke bawerîya xo bîyarê ca. Yezîtê nê çaxî bi zûr, zorbazî, tecrîd û talanî kenê ke Kerbelayêkê neweyî bikerê. Ewro ma eşkenê bi têkoşînê vera faşîzm, talanê xoza, qirkerdişê kulturî, asîmîlasyonî û tecrîdî rayîrê Huseyînî bipawê. Ma bi wesîleya Rojeyê Muharemî venga pêro elewîyan û azadîgîr û edaletgîran danê ke têkoşînê demokrasî hîna pîl bikerê. Sere de misilmanê şîîyî her keso ke têkoşînê Hz. Huseyînî keno, wa vera rejîmê faşîstî yê sentezê tirk-Îslamî yew cephe de têkoşînê demokrasî berz bikero.

Ma bi wesîleya Rojeyê Muharemî reyna nîyaz kenê ke xizmet û rojeyanê şima qebul bibê. Ma venga pêro heskerdoxanê Hz. Huseyînî danê ke vera zulmî têkoşîn bikerê. Ma bi na wesîle anê ziwan ke têgêrayîşê azadîye yê Kurdîstanî têgêrayîşo Huseynî yo modern o û têgêrayîşê ma de vîrameyîş û têkoşînê Hz. Huseyînî yenê pawitene. Ma venga pêro kesan danê ke refanê têkoşînê azadîye û demokrasî de cabigêrê.''