Komîteya Şaran û Bawerîyan a KCKyî bi eşkerayîyêke Roşanê Qurbanan pêro misilmanan rê fîraz kerd û venga pêro şaran da ke vera dewleta tirke ya qirkere bi hawayêkê rêxistinkerdeyî têkoşîn bikerê.

Eşkerayîye wina ya:

''Ma sey têgêrayîşî Roşanê Qurbanan ê pêro misilmanan fîraz kenê û hêvî kenê ke no roşan wa bibo wesîleya haştî, aramîye û edaletî. Ma hêvî kenê ke roşan bibo wesîleya xurtkerdişê dostanî, wayûbiratîye, paştdayîşê şaran û pîlkerdişê têkoşînê demokrasî û azadîye.

Roşan a roj a ke heredîyayîş qedîyeno, haştîye yena, paştdayîş û parekerdiş aver şinê. Heman wextî de roşan kulturê têkoşînê vera zalim û munafiqan o. Bi wesîleya roşanî vera hêrişanê qirkerdişî, talan û qatlîamanê sentezê tirk-Îslamî sere de kurdî ma venga pêro şaranê wayîrwijdanan danê ke seba haştîye û yewîya şaran têkoşîn bikerê.

Misilmanê ercîyayeyî yê Kurdîstan, Tirkîya û Rojhelatê Mîyanênî!

Roşanê Qurbanan a roj a ke qurbankerdişê merdiman ameyo qedexekerdene. Rixmê ney zî cografyaya misilmanan de her roje bi desan kesî yenê qetilkerdene. Domanî raştê hêrişê cînsîyî yenê, cinîyî qetil benê. Şarê misilmanî polîtîkayanê şerî yê dewleta netewe û hukmatanê faşîstan ra meseleyanê giranan de têrî yenê. Feraset û sîyasetê sentezê tirk-Îslamî seba hewesanê xo yê îqtîdarî her roje verê kişîyayîşê merdiman akenê û talanê xoza, meseleyanê herême kenê pîlêr û xorinêr.

Polîtîkayê kolonyalîstî û qirkerî yê ferasetê Îslamîyî yê îqtîdarî yê dewleta tirke seba kurdan wêrankerdiş, talan, qirkerdiş, îşkence û tecrîd û xizanîye ra ber çîyê bînî îfade nêkenê. Seke netîceyanê weçînayîşanê 2023yî de ame dîyene Îslamê tirkan seba îqtîdarî û menfaetanê xo Homa, Quran û Sunetî şuxilneno. Bawermendê ke raştîyan vînen ganî bizanê ke heta ke xeta Muhammedî de vera Îslamîyetê neteweperestî şer nêkê îbadetê înan nêresenê manaya xo. Coka ma wazenê dîyar bikerê ke têkoşînê misilmananê tirkan ê vera polîtîkayanê AKP-MHPyî qasê îbadetî xêr o. Misilmananê wayîrwijdanan rê erko yewin no yo ke wa nêbê hemkarê guneyan û sûcan. Ma venga pêro misilmananê kurdan-tirkan ê wayîrwijdanan danê ke seba demokratîkbîyayîşê Tirkîya, felatê şaranê Rojhelatê Mîyanênî û kurdan û Şorişê Rojhelatê Mîyanênî, vera faşîzm û îstîsmarkeranê dînî têkoşîn bikerê. Ganî nê kesî nêşorê camîyanê Dîyanetî û bi tewirê Hz. Muhammedî 'Her ca rîyê erdê mescîdî yo' têbigêrê. Ma wazenê vajê ke her tewir û têgêrayîşanê dînîyanê ke destek bidê rejîmê AKP-MHPyî, vera Îslamê Muhammedî yê. Ma pê bawer ê ke têkoşînê vera polîtîkayanê faşîstan ê rejîmê AKP-MHPyî sey îbadetî û serebirnayîşê qurbanî xêr o. 

Misilmanê ercîyayeyî;

Hêrişê peyênî yê vera Rojawanî de reyna îsbat bi ke rejîmê Îslamî yê dewleta tirke qirker o. Dewleta tirke teyna seba ke destkewteyanê kurdan çin bikera hêrişê Rojawanî kena, Îdareyê Xoserî kena hedef û hêrişê kurdanê azadan kena. Dewleta tirke bi taybetî bi hedefkerdişê cinîyan ê serkêşan bêtehamulîya xo eşkera kena. Ferasetê tirk-Îslamî wazeno cinîyan mîyanê tarîtîye de ver bido. Ma venga pêro cinîyan ê misilmanan danê ke têkoşînê demokrasî û azadîye yê vera faşîzmê tirkan têkoşîn bikerê. Kurdîstanijê ercîyayeyî; ma wazenê ke nê roşanî de zî şima goranê şehîdan zîyaret bikerê û duayanê xo kêm nêkerê. Bi taybetî zî keyeyanê şehîdan û tepişteyan zîyaret bikerê, paştî bidê înan. Ma bi girîngî wazenê ke wa xêr û ardimê xo bidê mexdûranê erdlerzî. 

Bi nê hîs û fikran ma Roşanê Qurbanan pêro misilmananê Kurdîstanî, şaranê Rojhelatê Mîyanênî û pêro alemê Îslamî rê fîraz kenê. Ma venga şaranê xo danê ke vera dewleta tirke ya qirkere û înkarkere hîna zaf têkoşîn bikerê û bi ruhê yewîya demokratîke tewrê têkoşînî bibê. Bi wesîleya roşanî şexsê pêro şehîdanê rûmetînan ê Zap, Metîna û Avaşînî de pêro şehîdanê têkoşînî de ma bi heskerdiş, minet û rêzî yad kenê. Ma înan rê perwerîya xo reyna pêşkêş kenê û soz danê ke têkoşînî bi serkewtişî tacîdar bikerê.''