Hemserekîya Konseya Rayberdişî ya KCKyî bi wesîleya serrgêra 31. ya Qirkerdişê Sîwasî eşkerayîya nuştekîye daye û nê vatî:

''2ê temmuze ya 1993yî de bi destê hêzanê dewlete otêla Sêwas-Madimakî de zafê înan roşnvîr, nuştox, hunermendî vera elewîyan hêrişê qirkerdişî ame kerdene. Otêla Madimakî dîyaye adirî ver û 33 elewîyî bi vêşnayîşî ameyî qetilkerdene. Peyê nê qirkerdişî de zîhnîyeto faşîst, nîjadperest û kanperest est o. Ma 33 Ganan  bi hurtmet yad kenê. Şexsê înan de reyna heme şehîdanê şoriş û demokrasîyî yad kenê. Ma do vîrardişê înan ê erjîyayeyan mîyanê têkoşînê xo de bidê ciwîyayene. Têkoşînê şaran do qetî hesabê heme qirkerdişan biperso, zîhnîyetê nîjadperest, faşîst û kanperestî bin bifîno û waştişê azadîya şaran bîyaro ca.

Komelê elewîyan seba ke mîyanê demokrasî, azadîye û haştîye ciwîyeno, tarîxî ra tim raştê hêrişê dewlete û hêzanê faşîstan û kanperestan yeno. Vera elewîyan zaf qirkerdişî ameyî kerdene û çend şino nê hêrişî zêdîyenê. Qirkerdişê tewr zafî zî bi destê dewleta tirke ameyî kerdene. Dewleta tirke bi hewayêkê sîstematîkî hêrişê elewîyan kena. Qirkerdişê Sêwasî zî înan ra yew o. Bi nê qirkerdişanê sîstematîkan yeno waştene ke bawerî û kulturê elewîyan werte ra bêro wedaritene û komelê elewîyan bêro qirkerdene. Heme qirkerdişê vera elewîyan bi nê waştişî ameyî kerdene. Nê hetî ra hêrişê vera kurdan û hêrişê vera elewîyan sey yewbînî yê. Dewleta tirke senî ke wazena kurdan qir bikera,eynî wina wazena elewîyan zî qir bikero. Nê hetî ra qederê kurdan û elewîyan yew o. Xora xeylêk kurdî elewî yê.

Rayber Apoyî seba ke nasnameyê komelê elewîyan vejîyo werte zaf kede da ke wa komelê elewîyan bibo azad û asîmîlasyonî ra xo bixelisno. Waşt wa komelê elewîyan pîya bi bawerî û şaranê bînan bi Têkoşînê Azadîye yê Kurdîstanî mîyanê dostîye û îtîfaqî de bo û semedê nê xebatê muhîmî kerdî. Xora Qirkerdişê Sêwasî zî nê semedî ra ame kerdene. Bi nê qirkerdişî ame waştene ke verê têhetameyîşê têkoşînê elewîyan û têkoşînê Kurdîstanî bêro girewtene. Seba ke roşnvîrê elewîyan bi hewayêkê pozîtîfî nêzdîyê têkoşînê şarê kurdî bîyî ame qetilkerdene ke wa verê nê bêro girewtene. Seba ke elewîyê kurd û elewîyê tirkî pîya Sêwas de ciwîyenî semedê qirkerdişî tîya ame vîjnayene.

Dewleta tirke seba ke têgêrayîşo sosyalîst û demokratîk ê Tirkîya û Têkoşînê Azadîye yê Kurdîstanî nêro têhet metodê winayênî şuxilnayî, hêriş, komplo û qirkerdişî kerdî. La rixmê heme dejan ke şaran rê dayî ciwîyayene waştişê ci nêame caardene. Nêeşkayî verê wayûbiratîya şaran û têkoşînê hemparî bîgêrê. Ma ganî nika nê şaran yewbînan rê dahîna bikerê nêzdî û azadîya şaran bîyarê ca. Xurtkerdişê têkoşînê yewbîyayeyî berpirsîyarîya ma ya tarîxî ya. Na çarçewa de ma veng danê heme hêzanê demokratîkan ke wa berpirsîyarîya xo ya tarîxî bîyarî ca têkoşînê yewbîyayeyî xurtêr bikerê.''