Erdogan dimayê binkewtişê weçînayîşê 31'ê Adare kewt terso ke girseyê derûdorê ey  ci ra durî bikewo û seba ke girseyê xo derûdorê xo de pêbigêro, tehdît bi sendîkayan, kedkaran keno. AKP yo ke bi rayberîya Recep Tayyîp Erdoganî şaredarîyan de zor bi xebatkaranê şaredarîyan keno ke sendîkayanê xo nêbedilnayê, nika zî, dimayê binkewtişê weçînayîşanê Stenbol, Enqera û xeylî bajarabê girdan de xebatkarê şaredarîye sendîkaya xo bedilnanê û  hukmat seba ke vernîya naye bigêro dest bi polîtîkaya tehdît û çimtersnayîşî keno.

Endamê Heyetê Rayberîya Tum Bel-Senî Sati Buruncu vat, AKP bi KHK’yî bi hezaran kerdkarî karan ra vetî, sendîkaya înan ra 1.500 kedkarê rayberîya bêsebeb, bêhuqûq kar ra ameyî vetene û ser de ame munaqeşekerdene ke nê kerdkarî weçînayîşî de eşkenê rayanê xo bidê yan ney.

Buruncu vat, şaredarîyê AKP’yî zext bi kedkaranê şaredarîye kenê ke Tum Bel-Senî ra vejîyê û bibê endamê Bem-Bîr-Senî.

Buruncu vat, xespkerdişê tazmînatê qidemî, caardişê mucburî ya BES'î, baco giran ê serê kerdkeranê destengan, bêkaran û feqîrîye cuya kedkaran giran kena û vat,  sebebê têkoşînê karker û kedkaran nê yê. Buruncu ard ziwan ke 1’ê Gulane seba înan roja muhîm a ke ê ramojnê ke ê nêwazenê barê krîzî înan ra bêro barkerdene, ê heqanê xo ra wayîr bivejîyê û vera hukmatî şarî reyde yewîya karker û kedkaran bimojnê.