Xoverdayîşê grevê vêşanîye yê hemverê tecrîdkerdişê Rayberê Şarê Kurdî Abdullah Ocalanî ke bi serkeşîya hemsereka KCD’yî Leyla Guvene dest pêkerd û bi tewrbîyayîşê bi hezaran kesan çar hetanê dinya de vila bi, bi qerardarîye dewam keno. Dîrektoro Îngilîz Ken Loachî seba paştdayîşî bido xoverdayîşê grevê vêşanîye mektûbêk nûşte.

Avûkat û senarîsto Îskoç Paûl Lavertyî û aktîvîste Sarah Glynne zî morê xo da bine mektûbe ro. Mektûbe de bale ancîyaye serê rol û muhîmîya Rayberê Şarê Kurdî Abdullah Ocalanî.

Mektûba Ken Loachî wina ya: “Ma wazenê pê bihesnê ke ma paştî danê 7000 ra zêdeyêrî Kurdan ê ke kewtê grevê vêşanîye û wazenê çarçewaya heqanê merdiman ê bingeyênan de raybero Kurd o tepişte Abdullah Ocalanî rê destûr bidîyo ke avûkat û keyeyê xo dir pêvînayîş bikero. Xeylî kesî seba heqanê merdiman ê bingeyênan kewtê grevê vêşanîye; na çalakîyêka bipeyme, cesûr û kolektif a. Na çalakî seba welatanê ke huqûqê mîyanneteweyîyî bica nêanê û hemverê zulmê barbarî yo ke serê Ocalanî de yeno kerdene nêvejênê, şermêk o. Muhîmîya Ocalanî hetê têgêrayîşê sendîka ra yeno zanayene. Galaya Madenkaranê Dûrhamî pêhesnabi ke înan kampanyaya xo ya mîyanneteweyîye ya serra 2018’î bi nameyê ‘Ocalanî rê Azadîye’ rayra berda. Vînayîşê Ocalanî yê derheqê demokrasîyê şarî, zaf-kulturî û heqê cinîyan, bîyê bingeyê vurayîşanê cimatkî yê Vakurê Sûrîye û xusûsen zî herêma xosere ya Kurdan. Ocalano ke seba Kurdanê Sûrîye tim vengdayîşê çareserîyêka aştîyaneye û bianore keno, sey Mandela yê Afrîkaya Başûre, çareserîya aştîyaneye ya ameyoxî de bewlîkerdox o. Vînayîşê êyê sîyasîyî çi benê wa bibê, bi tu hawayî nêno qebûlkerdene ke heqê merdiman ê bingeyênî yê tepişteyêkê sîyasîyî bêrê peygoşkerdene.Sazîyanê ma yê sîyasîyan reyna bi ser nêkewtî û paştdayîşê mîyanneteweyîyî de serkêşî şarî rê ameya verdayene.”