Muracatê pêvînayîşê bi Rayberê Şarê Kurdî Abdullah Ocalanî bi bahaneya cezaya dîsîplînî yenê redkerdene. Rayberê Şarê Kurdî tewr peyên 25ê adara 2021î de pê telefonî birayê xo Mehmet Ocalanî de qisey kerdbi û avûkatê xo zî 7ê tebaxa 2019î de dîbî.

Avûkatanê Buroyê Huqûqî yê Asrinî wexto ke 22ê teşrîna peyêne ya 2021î de seba pêvînayîşî muracat kerd pê hesîyayî ke 12ê teşrîna verêne ya 2021î de Mehkemeya Înfazî ya Bursa 6 mengî qedexeyê pêvînayîşî dayo. Dima ke no qedexe nîsana 2022yî de qedîya avûkatan reyna muracatê pêvînayîşî kerd la narey zî ê pê hesîyayî de 13ê nîsane de 6 mengan qedexeyê pêvînayîşî dîyayo Rayberê Şarê Kurdî. Mîyanê na serre de Komîteya Wezîran a Konseya Ewropa derheqê bira 'heqê hêvîye' ya Mehkemeya Heqanê Merdiman a Ewropa (MHME) de Tirkîya ra agahîye waşte. Tirkîya ra ame waştene ke nê agahîyê serê Ocalanî heta êlula 2022yî eşkera bikera.

Sereka Komeleya Heqanê Merdiman (ÎHD) ya Îstanbulî Gulserene Yolerî cezayê dîsîplînî û bêvengîya dezgehanê mîyanneteweyîyanê sey CPTyî ANFyî rê ercnayî. Gulserene Yolerî ard ziwan ke derheqê kerdişanê xiraban û tecrîdî de mîsalo tewr pîl û girîng Zîndanê Îmraliyî yo û vat: ''Îmrali de caardiş û nêzbîyayîşî goreyê şexs û taybet ê. Nê zîndanî de bi hawayêkê 'fermî' cîyakerîye yena kerdene.''

Gulserene Yolerî îfade kerd ke Îmrali de caardişî bi armancanê sîyasîyan yenê kerdene û vat: ''Wexto ke welat de kurdan rê bi hawayêkê haştîyaneyî serdestî nêzdî benê, Îmraşi de kerdişî yenê nermkerdene. La wexto ke welat de polîtîkayê şerî yenê caardene hînî Îmrali de zî kerdişî yenê girankerdene. Eke zîndananê bînan de tepişteyî eşkenê keyeyan û avûkatanê xo bivînê ganî tepişteyê Îmraliyî zî bivînê. Hem Îmrali de hem zî zîndananê bînan de cezayê dîsîplînî seba xeylêk tepişteyan babetêka girîng a. Cezaya dîsîplînî astengkerdişê azadîya merdiman o, tecrîd hînî wina bîyo ke hacetêkê ferzkerdişê bahaneyanê keyfîyan o. Bêguman vera nînan têkoşîno huqûqî zaf girîng o. Coka ganî rayaumûmîye na mesele bimusa. Ganî hem têkoşîno huqûqî hem zî têkoşîno komelkî vera tecrîdî bêro xurtkerdene.''

Gulserene Yolerî bale ante bêvengîya dezgehanê mîyanneteweyîyan ser û vat: ''Bêvengîya dezgehanê sey CPTyî rewşêka newîye nîya. Ma şahîdê ci yê ke CPT bi serran o vera îşkence û binpaykerdişê heqanê tepişteyan bêveng o. A raşte dezgehê sey CPTyî cara hetê welatanê serdestan ra ronîyayê. Nê dezgehî eke Tirkîya destûr bida raporanê xo eşkera kenê. Yanî no zî goreyê sîyasetê Tirkîya qewimîyeno.''