Grevê vêşanîye yê Leyla Guvene kewt roja xo ya 140’ine û reyna hepisxaneyanê Tirkîya û xeylî merkezanê Ewropa û dinyaye de çalakîyê grevê vêşanîye dewam kenê. Roşinvîran seba Leyla Guvene peyamê paştdarîye dayî û waşt ke wa tecrîdê Îmraliyî derhal bêro wedaritene.

Flozof Slavoj Zîzek: “Merdim nêeşkeno vajo ewro Tirkîya de demokrasî esto. Merdim eşkeno rejîmî ancax bi xedarî û tedayî name bikero. Tirkîya de seba haştîye, seyyewbînîye û demokrasîyî ganî Kurdan de dîyalog bêro ronayene û yew alternatîfo bîn zî çin o xora. No dîyalog ke bêro astengkerdene, verê rijnayîş û şerî abeno. Ez naye ra zî paştdarîye dana talebanê Leyla Guvene û bi hezaran merdimanê ke her hetê dinyaye de, seba azadîya Ocalanî kewtê grevê vêşanîye. Tecrîdê serê Birêz Ocalanî ke bêro wedaritene û dîyalog ke bêro ronayene, verê Tirkîya abeno û ancax bi nê qeydeyî demokrasî do bêro Tirkîya.

Prof. Peter Ott: “Bi Îngilizkî “hemra”, Almankî de yeno manaya “Genosse”, Kurdî de zî yeno manaya “rêheval” î. Manaya na çekuye zaf sade û safî ya: Hemra. Raxelesîyayîşê dinyaye zî ancax bi ruhê hemrayîye mumkin o. Ganî ma qisey bikê û têser bikê,
ganî ma muzakere bikê. Tecrîdê serê Birêz Ocalanî û pêroyê girewteyan, derhal bêro wedaritene.”

Akademisyene Susî  Merete: “Ez paştdarîye dana çalakwananê grevê vêşanîye û qerardarîya înan do çareserîye bîyaro. Ez bawer kena ke ê do bi çalakîyanê xo krîzê welatê xo û welatanê cîranan bi qerardarîya xo çareser bikerê. Birêz Ocalanî serbest biverdê.”

Dr. Tove Skutnabb-Kangas: “Sîyasetmedarê Tirkî çi wext benê biaqil? Keso ke peşnîyazê ci yê çareserîye estê serbest biverdê!Ez bi serran o hemmesleganê xo yê çar parçeyê Kurdistanî ra xebetîna.  Mi Kurdistanê Iraqî, bi taybetî zî Kurdistanê Tirkîya xeylî dolimî zîyaret kerd. Wezîrê Perwerdeyî yê Iraqî yê ê wextî Abdul-Azîz Taîbî serra 2006’î de yew roportaj de vatbi “Dinyaye de ganî her doman bi ziwanê dayîka xo perwerde bivîno”. Ez qisaya ey her tim sey nimûne musnena. Qisaya bimantiqe ya. Her hetê dinyaye de merdimî vanê “Heya-Heya. Bêguman wina yo”. Mi zî hîrê kitabê Ocalanî wendî. Qanûnê Tirkîya heqanê Kurdan nêşinasnenê, bi taybetî zî heqê perwerdeyî yê ziwanê ci nêno şinasnayene. Amîr Kalan yew Îranij o û Kanada de ciwîyeno. Serra 2016’î de yew kitab nuşt û nameyê kitabî wina na pa: ”Perwerdeyê Zaf Ziwanîyî ra Kam Terseno? Reyna qaso ke aseno sîyasetmedarê Tirkî, ekonomî ra zî fehm nêkenê. Vera Kurdan şerê qirkerdişî yo wehşî yeno kerdene û butçeya ke nê şerî de yena xerckerdene, butçeyêka zaf pîle ya. Mabênê serranê 2002-2007’î de 10 mîlyar dolar şerê vera Kurdan de ameyo xerckerdene. No 10 mîlyar dolar ke seba weşîye, perwerde yan zî seba averberdişê bajaranê Kurdan ke biameyêne şuxulnayene, ewro halê Tirkîya wina nêbîyêne. Reyna goreyê doneyanê SIPRI'yî Tirkîya serra 2017’î de, yanê yew serre de 18 mîlyar dolar seba şerî xerc kerdo. Na seba karê Kurdan û Tirkan nîya. Wextêk pêvînayîşê haştîye ameybî destpêkerdene. No yew hêvî bi û sîyasetmedaranê Tirkî zî no dî. Nika o proses ameyo wedaritene. Polîtîkayê wehşî yê vera merdimahîye, sûcê vera merdimahîye, qetlkerdiş û qirkerdişî ewro zî dewam kenê. Derheqê terorê dewleta Tirkî de raporê muhîmî ameyê nuştene û merdim nê raporan de rastîye eşkeno bivîno. Bi des hezaran kesî ameyê tewqîfkerdene, îşkence ameyo kerdene, ameyê kiştene la mucadele û xoverdayîşê Kurdan her ke şîyo bîyo hîra û ewro seba haştîye çareserîye ra gêreno.Ewro fîguro tewr muhîm, yanê Mandelayê Tirkîya Abdullah Ocalan binê tecrîdî de yo. Çalakwanê grevê vêşanîye wazenê ke tecrîd bêro wedaritene. Ez bi zerî û can nê xoverdayoxan het de ya. Kesê dinyaye yê bînî se kenê? QET ÇÎYÊK, tena çekan roşenê leşkeranê Tirkîya.”

Zanyaro sîyasî Joaquim Arrufat Ibáñe:  “Ma Katalanî mucadeleyê şima û hêrsê şima yê vera bêedaletîye fehm kenê. Ma her roje newe ra vînenê ke qanûnî senî yenê binpaykerdene û bêedaletîye senî bena hêzê destê îqtîdarî.Ma zî sey şima, peyê dêsanê hepisxaneyî de kenê ke sîyaset bikê. Ma zî bedenanê xo seba talebanê xo yê azadîye û heqanê xo şuxulnenê. Ma zî şarê xo seba rojanê baş û weşan kenê ke bîyarê têhet û sey şima wazenê ke wayîrê erj û rûmetî bê.”