Leyla Guvene 128 rojî yo, bi talebê wedaritişê tecrîdê serê Rayberê Şarê Kurdî Abdullah Ocalanî  grevê vêşanîye de ya. Seba Leyla Guvene peyamê paştdarîye yê mîyanneteweyîyî yenê dayenê û seba ke talebê ci bêrê ca, dewleta Tirkî rê vengdayîşî yenê kerdene.

Hemkara Serekîya Partîya Keske Jamîla Schafere û parlamentera federale Canan Bayrame waşt ke Tirkîya agêro prensîpanê dewleta hiqûqî ser û tecrîdî wedarno, talebanê Leyla Guvene bîyaro ca. Sîyasetmedaran derheqê rewşa weşîye ya Leyla Guvene de qisawetê xo ardî rê ziwan û waşt ke seba çareserîye dîyalogî bêrê kerdene.

TECRÎD SÛCÊ VERA MERDIMAHÎYE YO

Schafere waşt ke prosesê dîyalogî bêro ronayene û seba talebanê Leyla Guvene paştdarîya xo kerde eşkera û wina va: “Tecîr vera heqanê merdiman o, qet yew ca de- hepisxane de bo zî, ganî kesî rê nêro kerdene.“

Schafere dewamê qiseykerdişê xo de bale ante weçînayîşê 31’ê Adare ser û va AKP weçînayîşî ra ver keno ke vengê muxalîfan bibirno û naye ra zî keno ke welat de hawayê tersî bibo vila. Canan Bayrame zî waşt ke weçînayîş de pêro namzedî bi hawayê demokratîkî xebatanê xo bikerê û wina va: “Ma hetê kesê ke seba Tirkîyaya Demokratîke xebetînê de yê û paştdarîye danê ci.“