Hemserekê Pêroyî yê DBPyî Keskin Bayindirî derheqê hêrişê îşxalî yê dewleta tirke û xeta îxanetî ya PDKyî ANFyî rê qisey kerd.

Keskin Bayindirî nê vatî: ''Dewleta tirke wazena statuyê Başûrî werte ra wedaro û no bi waştişêkê stratejîkî yeno kerdene. PDK bi hemkarîya deweta tirke vera têkoşînê azadîye yê şarê kurdî damarêka îxanetî pêard. Na damara îxanetî wazena têkoşînê şarê kurdî bi metodanê cîya cîyayan bifatisno.  Xora Başûr de hêrişê leyminî û hemkarîyê tarîyî dewam kenê. Dewleta tirke têna Başûr de nê wazena Rojhilat û Vakurê Kurdîstanî de zî bi şerî bandura xo bidomno.''

Bayindirî ard ziwan ke dewleta tirke şerê vera şarê kurdî de çekanê kîmyewîyan şuxulnena û wina vat: ''Dinya vera nê şerî polîtîkaya dirî rayra bena.Ewro dewleta tirke Başûr de cinîyan û ciwananê kurdan bi hêrişê hewayî û suîkastî qetil kena. Rojawan ra heta Şingalî şarê kurdî hedefê hêrişanê suîkast û hewayî de yo. Nê hêrişî bi paştdayîşê PDKyî yenê kerdene. PDK bi dewleta tirke hemkarîye keno ke ser bikewo la nê têkîlîyê ke înan nayê ro semedê wedartişê statuyê şarê kurdî yê.''

Bayindirî bale ante muhîmîya Yewîya Neteweyî ya Kurdan ser û nê vatî: ''Ewro şarê kurdî hewceyê yewbîyayîşî yo. Ganî ma teberê PDK û na xeta hemkarîye de yewîya xo ronê. Na yewîye ganî vera xeta îxanetê PDKyî vejîyo. Ganî şarê kurdî vera na xeta îxanet û îşxalî têkoşîn bikero. La berpirsîyarîya ney milê şarê Başûrî de ya. Her ca de pêro kurdî vera na xeta îxanetî hêrsbîyaye yê. Başûrê Kurdîstanî de verê ma de vîjnayîş est o. Ewro verê şarê Başûrî de di rayîrî est ê. Ya vera xeta îxanetî çalakîya zereyî keno. Ya zî çarçewaya demokratîkbîyayîşî de ganî na xeta îxanetî bêro rijnayene. Seba ke şarê Başûrî xo xeta îxanetî ra bixelisno, no vîjnayîş firsetêk o.''