Hemsereka Pêroyî ya ÎHDyî Erene Keskîn vat tepîştîya nêweşe Fatma Tokmak roje de têna saetêke eşkena şiro hewna û Mucella Yapici zî semedê protestokerdişê binpaykerdişê heqan şîyayîşê nêweşxaneyî red kerd.
Hemsereka Pêroyî ya Komelaya Heqanê Merdiman (ÎHD) Erene Keskîn 8ê hezîrane de Zîndanê Qefilnayeyî yê Cinîyan ê Bakirkoyî zîyaret kerd.
Keskine badê zîyaretî bale ante rawşa tepiştîya nêweşa girane Fatma Tokmak ser ke 22 serrî yo zîndan de ya. Tokmake 1996 de Kocaeli de pîya bi lajê xo Azad ke di serre bi, ameye tepiştene û hetê Mehkemeya Asayîşî ya Dewlete (DGM) ra cezaya muebedî dîyaye ci. Verê zîndanî nêweşîyêka ci çînêbî. Mîyanê nê serran de rîyê îşkence û şertanê xiraban ra sere de nêweşîya zerrîye, tede xeylêk nêweşîye giranî vejîyayî. 2006 de rîyê nêeşîyan ra ameye tehlîyekerdene la 2010 bado ke mehkemeya berze ceazaya ci tesdîq kerde newe ra ameye tepiştene û Zîndanê Cinîyan ê Bakirkoy de ameye cakerdene. Keskine vîst vîrî ke muwekîla ci Fatma Tokmak rîyê sûcêkî aye nêkerdo ra zîndan de yena tepiştene û nê vatî: “Gama ke Tokmake ameyêne muhakemekerdene tirkî nêzanayêne û pê zorî îfadeyêkî rê îmzaya ci ameye eştene. Pîya bi gergûşê xo îşkenceyê giranî dîyî. Dezgehê Tibê Edlîyî (ATK) raporê eşkena zîndan de bimano dayo ci. Xora ATK tim derheqê tepişteyanê sîyasîyan de wina qeraran geno. Waqfê Heqanê Merdiman (TÎHV) raporê a nêeşkena zîndan de bimano da. Heme muracatê ke ma semedê tehlîyekerdişê Tokmake kerdî, hetê Serdozgerîye û Wezîrîya Edaletî ameyî redkerdene. Rewşa Tokmake çend şina xirabêre bena. Nika roje de têna saetêke eşkena şiro hewna. Tokmake hinî nêeşkena nefes bîgêro û doktor aye rê eleqedar nêbeno. ”
Keskîne eynî roje Endama Heyetê Rayberdişî ya Yewîya Odayanê Mîmaran û Muhendîsan ê Tirkîya (TMMOB) Mucella Yapici ya ke çarçeweya Dewaya Gezî de ameye tepiştene, a zî zîyaret kerde. Keskîne vat Yapici semedê protestokerdişê binpaykerdişê heqan şîyayîşê nêweşxaneyî red kerd.
