Sereka Pêroyî ya ÎHDyî Erene Keskîna ke pa Mayanê Şemeyî her hewte yena destbendkerdene, ard ziwan ke înan waşt ke Wezîrê Karanê Zereyî de pêvînayîş bikerê la 10 rojî yo cewab nêdîya waştişê înan.
Rixmê bira 'binpaykerdişê heqî' ya Mehkemeya Qanûnê Bingeyî (AYM) 10 hewte yo destûr nêdîyeno ke Mayê Şemeyî Meydanê Galatasarayî de eşkerayîye bidê. Polîsî bi bahaneya qedexeyê Qeymeqamîya Beyogluyî tim Mayanê Şemeyî û aktîvîstan destbend kenê. Sereka Pêroyî ya Komeleya Heqanê Merdiman Erene Keskîna ke destê ci de rêçê kelepçeyan virazîyayo, derheqê na bêhuqûqîye de ANFyî rê qisey kerd.
Keskîne vist vîrî ke Mayê Şemeyî 1995 ra nata seba ke aqîbetê vînîbîyayeyan eşkera bibê têkoşîn jenê la 2018 ra nata nêeşkenê çalakîya xo bîyarê ca. Keskîne bale ante ser ke rixmê bira AYMyî zî her hewte Meydanê Galatasarayî de Mayê Şemeyî raştê hêrişan û qedexeyî yenê.
Keskîne da zanayene ke ê zanenê ke bira Qeymeqamîya Beyogluyî şexsî nîya; bira Wezîrîya Karanê Zereyî ya. Keskîne vat: ''Ma Wezîrê Karanê Zereyî yê neweyî ra randevuyê pêvînayîşî waşt. Seba ke Mayê Şemeyî raştê qedexe, astengkerdiş û kerdişanê xiraban yenê ma wazenê pêvînayîş bikerê. La waştişê randevuyî 10 rojî xo pey de verdayî û hema zî cewabêk nêdîya ma.''
Keskîne qala îşkenceyê destbendkerdişî kerde û vat: ''Wexto ke ma yenê destbendkerdene nêeşkenê îhtîyacîyanê xo yê bingeyînan zî bîyarê ca. Na çalakîya ke 1995 ra nata est a senî sey tehlukeyîne' yena ercnayene? Mumkîn nîyo ke no bêro famkerdene. Ma ney qebul nêkenê û qetî Meydanê Galatasarayî ra fek vera nêdanê.''
