Dewleta tirke ya îşxalkere hetêkî ra hêrişê goranê gerîlayan kena hetêkê bînî ra zî keyeyanê gerîlayan rê dewaya tazmînatî akena. Dewleta tirke keyeyan rê bi bahaneya 'zerar dayo malê dewlete', 'hêrişê wezîfedaranê dewlete kerd' dewa akena.

Avûkat Muhîttîn Muguço ke dosyaya keyeyêkî teqîb keno pare kerd ke dima ke tûtê keyeyî şehîd beno Wezaretê Karanê Zereyî û Fermandarîya Pêroyî ya Cendirmeyan keyeyî rê dewa akenê.

Muguçî vat: ''Dima ke nê gerîlayî şehîd benê tesbîtê zerarî yeno kerdene. Çunke beno ke nê şerî de wezîfedarê dewlete birîndar bîyî yan zî wesayîrê înan îmha bîyo ûsn. Tesbîtî ra dima keyeyan rê dewa yena akerdene. Verî ke keyeyan rê teblîgat bêro erşawitene înan rê dewa yena akerdene. Keyeyî zî dima ra musenê.''

Muguçî derheqê prosesê akerdişê nê dewayan de vat: ''Seba ke dewaya winasêne bêra akerdene ganî werte de neheqîyêka eşkera biba. La nê dosyayanê keyeyan de çîyo eşkera çin o. Texmînan ser o şinê. Nê dewayî 3-4 serrî yo yenê akerdene. Nika destê ma de 3 dosyayê winasênî estê. Ez avûkatîya keyeyêkî kena û dewlete nê keyeyî ra 13 hezar TL waşto.''