Çalakwanê ke vera tecrîdkerdişê Rayberê Şarê Kurdî Abdullah Ocalanî kewtê grevê vêşanîye, sewîyeya krîtîke ra zî derbaz bîyî. Seba ke heta nika dewlete gamêk nêeşta, 7 girewteyan û Almanya de zî welatperwerêk bi nameyê Ûgûr Şakar çalakîya fedaîye kerde û cuya xo kerde vîndî. Rewşa çalakwananê grevê vêşanîye saete bi saete giran bena. Merdimê girewteyan zî seba ke tecrdê serê Ocalanî bêro wedaritene,  seba ke Wezareta Edaletî rê bêrê şawitene dest bi kampanyaya şawitişê waştişnameyan kerd. Keyeyan venga her kesî da ke wa bi berpirsîyarîye tewrê kampanya bibê.

Waştişnameyî de derheqê tecrîdkerdişê Ocalan û grevê vêşanîye yê zîndanan, welat û teberê welatî de zanayîşî amayî dayene û nê waştişî Wezîrê Edaletî yê Tirkîya Abdulhamît Gulî ra ameyî kerdene:

“Ma şima ra û wezîrîya şima û Dewleta Komara Tirkîya ra wazenê; heqê mehkûman o avûkatan û merdimanê xo reyde pêvînayîşkerdiş bîyarê ca, ke no heq, qanûnan, qanûno bingeyên û belgeyanê heqanê merdiman ê mîyanneteweyî de bi hawayêkê akerdî ameyê naskerdene.  Waştişê ma şima ra o yo ke kerdişê ke teberê huqûqî de yenê kerdene berê qedênayene, ke rîyê nê kerdişan ra girewteyan dest bi grevê vêşanîye kerd. Ma hêvîdar ê ke no waştişnameyê ma yo merdimî û heqdar yeno qebûlkerdene.”