Emîne Şenyaşara ke di laj û mêrdeyê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde verê Edlîyeya Riha de nobeta xo ya edaletî rê roja 154. de dewam kena.  

Ferît Şenyaşarî nobete de qisey kerd û vat: ''3 merdimê ma nêweşxane de pê lînçkerdişî kişîyayî. Serebûtî 3 serrî û 2 mengî peyê xo de verdayî. Dozgerî pêvînayêkê ma de vatbi 'Ma hêriş de 23 kesî tesbît kerdî.'Eke Tirkîya dewleta huqûqî ya wa nê 23 kesî bitepişîyê. O çax ma zî şinê keyeyê xo. Dadîya mi 65 serre ya, binê zulmî de ciwîyena. Eke muhakeme ser o teda esta ganî dozgerî cayê xo de nêvinderê.''

Keyeyê Şenyaşarî twitterî ser o zî wina vat: ''Xeylêk cayanê Tirkîya de bêhuqûqîye esta, çew nêeşkeno ney înkar bikero. La Qesra Edaletî ya Riha bêhuqûqîye de rêzê 1. de ya. 3 merdimî nêweşxane de ameyî qetilkerdene, 3 serrî yo îdîaname çin o. Hemwelatîya têdûşte na ya?''