Emîne Şenyaşara ke serra 2018î de di laj û mêrdeyê ci hetê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde çalakîya xo ya nobeta edaletî rê dewam kena.

Keyeyê Şenyaşarî roja 77. ya nobeta edaletî de verê Edlîyeya Riha de ronişt.

Keyeyî hesabê xo yê medyaya dîjîtale ser o no mesaj da: ''Nêweşxaneyê Dewlete yê Pirsûsî de 3 merdimê ma kişîyayî. Wa selahîyetdarêk vajo 'çîyêko wina çin o.' Ma zî do şorê keyeyê xo. Kiştoxî verê çiman de yê la dozgerêk çin o ke bieşko înan muhakeme bikero. Têkoşînê ma yê seba edaletî do dewam bikero. Ma do bêveng nêmanê.''