Emîne Şenyaşara ke di lajê ci û mêrdeyê ci hetê merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde 72 rojî yo verê Edlîyeya Riha de nobeta edaletî kena.

Keyeyî dowîzê 'Nêweşxaneyê Dewlete yê Pirsûsî de qirkerdiş ame kerdene ma edaletî wazenê', 'Ma têna edaletêkê xoserî wazenê' û 'Ma wazenê edalet bêro caardene' erdî ra rakerdî û dest pê çalakîya xo kerd.

Polîsan nêverda ke keye baxçeyê mehkeme de çalakîye bikero coka keye şi verê berê mehkeme.

Ferît Şenyaşarî vat: ''Ma 72 rojî yo seba edaletî têkoşîn kenê. Ewro betlaneya fermî ya la ma çalakîya xo dewam kenê. Vera keyeyê ma qirkerdiş ame kerdene la kiştoxî serbest gêrenê. Ma ney qebul nêkenê, merdimîye zî qebul nêkena. Ma verê edlîye de yê û heta muhakemekerdişêko edîl bêro kerdene ma do têkoşînê xo ra fek vera nêdê. Kesê ke van3e wijdanê mi esto wa bibê teqîbkerdoxê na dewa.''

Keyeyî serê twitterî de zî no mesaj pare kerd: ''Babî û birayê ma nêweşxane de kişîyayî. 3 serrî yo kiştoxî xo rê gêrenê. Kiştoxî pê bêcezaverdayîşî ameyî xelatdayene.''