Adar Baş Zîndanê Sîlîvrî ra semedê gonîrijîyayîşê mîde wedarîya servîsê lezgînî yê Nêweşxaneyê Kanûnî Suleymanî. Dima 19ê hezîrane de dinyaya xo bedilnaye. Başo ke çeleyê 2020î de derheqê ci de tehqîqat estbi şi TEMê Îstanbulî û 'rotişê narkotîkî' ra tepişîya. Dima ke o şeş mengî zîndan de mend wedarîya servîsê lezabezî û derheqê ci de bira veradayîşî dîyaye. Goreyê îdîaya embazê ey ê koxûşî Serkan Koçakî 3 rojî fekê Başî ra gonîye ameye la rixmê pêro muracatan zî o nêwedarîya revîr. Peynîya 3 rojan de o pê wesayîtî wedarîya nêweşxaneyî.

Babîyê Adar Başî Cevdet Başî pare kerd ke Esenyurt de her serre ciwanê kurdî pê îdîaya 'rotişê narkotîkî' tepişîyenê. Cevdet Başî da zanayene ke  semedê tewrbîyayîşê mîtîng û çalakîyan polîsî cara tim erzenê keyeyê înan ser.

Adar Baş hema ke 14 serre bi ame zewijnayene û 2 domanê ci estê. Goreyê Raporê Raporê Tipê Edlîyî Baş rijîyayîşê gonîya mîde ra merdo. La keyeyî ci vat eke o hîna rew bişawîyayêne nêweşxane bixelisîyayêne. 

Cevdet Başî vat: ''Stresî ra lajê mi wina bi. Xora semedê sereştişê keyeyî ey keyeyê xo hewilnabi Kartalî. Wextê servîsê lezabezî de bira veradayîşê ci dîyaye. Wexto ke o wedarîya nêweşxane ez şîya mi waşt dozger bivîna la înan ez asteng kerda. Servîsê lezabezî de destê lajê mi kelemçekerde bîyî. Ez reyna şîya hetê dozgerî. O çax înan kelemçe vet la pê layî ling û destê ci girê dayî. Eke lajê mi sûcdar bi çira derheqê ci de bira veradayîşî dîyaye?''

Embazê Başî yê koxûşî Serkan Koçakî zî vat: ''Semedo ke Adar şoro revîr ma her roje waştişname da gardîyanan la înan ê teslîm nêkerdî. Roja hîreyêne wexto ke ma da beran ro hînî o amebi berdene. Xora roja ke o amebi koxûşî gardîyanan dabi înan ro. Hewteyêkî ra dima o eşka nan biwero.''