Namzeda Partîya Çep a Keske ya Îstanbulî Kezbane Konukçu derheqê weçînayîşan de ajansê ma rê qisey kerd. 

Kezbane Konukçu ard ziwan ke arefeyê weçînayîşan de rejîmê tekcamêrdî wazeno provokasyonan bikero û vat: ''Şarê ma zaneno ke no rejîm do bin bikewo. Rejîmê AKPyî cara 7ê hezîrana ra nata bin keweno. Coka her firsend de hêrişê hêzanê ma yê partîye û demokrasî keno.

Şarê ma vîneno ke krîzo ekonomîk çi aste de yo û zaneno ke seba ke na feqîrîye û vêşanîye biqedo vurîyayîşêk lazim o. Îstanbul de nika 12 wekîlê ma est ê la ma wazenê 100 wekîlan bişawê Meclîsî. Goreyê anketan ma bi rehetî 16-17 wekîlan vejenê. Dewrê neweyî de Partîya Çep a Keske do biba adresê vurnayîş û vurîyayîşî. Dewrê neweyî de vera faşîzmî rolê ma dîyarker o.''