Konseya Rayberdişî ya KNKyî, dîyar kerd ke nê wextanê peyênan de teberê sînoran ra hêrişê dewleta Tirkî vera Kurdistanî zêdetir bîyî û mintiqayê ke mabênê Duhok û Colemêrgî de yê yenê  bombardûmankerdene.

KNKyî bale ante ke zereyê serre de rîyê bombardûmananê dewleta Tirkî yê serê Wareyê Pawitişî yê Medya ra qetlîamê sivîl ameyî kerdene û bitaybetî nê bombardûmanî serê dewanê  ke der-dorê awa Zapî de yê tesîro gird kenî.  KNKyî sivîle ke roja Çarşemeyî ameyî qetilkerdene ardî vîrî û vat: “Bombarduman a  pîya baregehê eskerîyî ke xeta Zaxo û Duhokî ra heta Amedîye ameyî cakerdene, înan ra hêrişî benê û nê ciwîyayîşê şarê herême rê benê asteng.”

KNKyî ard vîrî ke, wextê hêrişanê Dêralok, Reşawa û Şêladizê de dewijanê dewa Êtute reaksîyonê girdî musnayî û şarê herême dewleta Tirkî mintiqaya xo de nêwazeno û wina dewam kerd:  dewleta Tirkî seba seveknayîşê baregehî esker û helîkopteran dana şawitene. Awankerdişê baregehê eskerî û hêrişê dewleta Tirkî do nêrê qebulkerdene. Dewleta Tirkî bi nê hêrişan huqûqê Dewlete Federala Iraqî gêna binê lingan. Ganî hem Herêma Kurdistanî hem Hukmatê Federalê Iraqî bi huqûqê demokratîkî xo bisevekno û vera dewleta Tirkî reaksîyon bimojno.”

KNKyî seba kesanê ke bombardûmanan ra cuya xo kerda vîndî serweşîye waşte û venga berpirsîyaranê sîyasî û sivîlanê Kurdistanî da ke vera operasyanan vengê xo berz bikerê.