Kanalê televîzyonî yê ARTE'yî ke bi ziwananê Franskî û Almankî weşan keno, derheqê dramê koçberanê ke Sûrîye ra remayê û şîyê Tirkîya dokumanterêk weşana. Dokumenter de bi taybetî bale ancîyaye serê hîkayeya koçberanê Sûrîyeyijan ê ke kewtê destê mafyaya organan û ame vatene ke koçberî seba ke vêşan memanê, yan zî bieşkê şirê welatanê Ewropa neçar manenê ke velkeyanê xo roşenê.

Dokumenter de qalê cinîyêka koçbere ya Sûrîyeyije ya ke Hatay de ya keno ke a neçar menda qey 5 hezar Euroyî velka xo biroşo. Cinîya koçbere ard ziwan ke seba bieşko şiro Almanya û xo biresno keyeyê xo, velka xo rota yewê Erebistanê Siûdîyijî rê û vat, kontrolê weşîye û yê emelîyatî yê seba vetişê velke Enqere de sazîyêka fermîye de ameyê kerdene.

Dokumenter de yeno vatene, penaberî bi rayîrê medyaya cimatkîye têkilîye açarnayoxî dir yan zî mafyaya velkeyan dir ronenê û ame vatene, ciwanêkê bînî yê koçberî Stenbol de velka xo bi 15 hezar Dolarî rota.  Dokumenter de qiseykerdişê ê koçberî zî ame weşanayene: "Dimayo ke ez amîya Stenbol, mi dî ke keda ma yena werdene. Sere de ez roje de bi 2-3 Euroyî amîya xebitnayene û heta nika mi xeylî karî vurnayî. Teberê rotişê velkeyan de merdiman rê yew rayîrê bînî nêverdanê."

TÎRYAKÎ RA DIMA TEWR ZAF TÎCARETÊ ORGANAN YENO KERDENE

Hadrekerdoxanê dokumenterî wextê antişê dîmenan de tespît kerd ke ka mafyaya organan Stenbol de senî koçberan vînenê û verê girewtişê velkeyan înan kamcîn otelan de bica kenê. Romojîya ke mîyanê karanê neqanûnîyan de dimayê tîcaretê tîryakî ra, oyo ke tewr zaf Tirkîya de yeno kerdene tîcaretê organan o.

Dokumenter de ame vîrardene ke Tirkîya de rotişê velkeyan qedexe yo, labelê hemverê nê tîcaretî yê teberê qanûnî de tedbîrê lazimî nênê girewtene.  Dîya zanayene, xeylî mafyayê velkeyan ê ke wareyê mîyanneteweyîyî de xebitênê, dimayê velkeyanê koçberanê Sûrîyeyijan ê.  Dokumentero ke seba programê "Reportage" yê ARTE'yî ame weşanayene de ame vatene ke mafyaya organan gama îmkan nêvînena ke Tirkîya de emelîyat bikero, koçberan bena Misir û ûca velkeyanê înan vejena.