Komê nîjadperestî yê Tirkîya xo hesabanê medyaya dîjîtale de rêxistin kenê. Nê komî vejîyenê waran û hêrişê kurdan, koçberan, rûman û merdimanê xerîban kenê.

Tewr peyên Eskîşehîr de kesêko ke kincê Nazîyan xo rê kerdbî hêrişê şarî kerdbi. Nê serebûtî babeta nîjadperestîye newe ra viste rojdem. 

Awanbîyayîşê komara Tirkîya ra nata xeylêk komanê faşîstan xo rêxistin kerd. Dewlete zî bi hawayêkê zelalî yan zî nimiteyî paştî daye nê koman.

Mahmut Esato ke embazê Ataturkî yo nêzdî û ronayoxanê sîstemê huqûqî yê tirkan ra yew bi, peynameyê 'Bozkurtî' hetê Ataturkî ra dîyabi ci. Ey 1930 de seba Serewedaritişê Agirî vatbi: ''Êyê ke tirk nîyê, welatê tirkan de teyna eşkenê xizmetê tirkan bikerê.'' 

Tirkîya de propagandaya faşîzmî ya tewr girînge hetê Cevat Rifat Atîlhanî ra ameye kerdene. Ey dişmenîya yahudîyan kerdêne, kovara Mîllî Înkilapî de faşîzm wasifnayêne. Dima tay endamanê CKMPyî komela bi nameyê 'Nasyonal Aktîvîte ve Zînde Înkîsaf' awan kerde û Tirjîya de verê rêxistinîya çekdare ya faşîzmî akerd. Di yewinê şerî yê cîyayî yê na komele est bîyê û nînan kincê Nazîyan kerdêne xo ra. Nînan fikrê Mahmut Esat Bozkurtê faşîstî ardêne ziwan, dima nê fikrî hetê Nîhal Atsiz û Necîp Fazil Kisakurekî ra ameyî rêxistinkerdene. Nînan ra tay kesan Tugayê Qesasî yê Tirkan (TÎT) awan kerd û dest pê hêrişê şorişgêran û rêxistinan kerd. La endamê TÎTî qetî nêameyê cezakerdene.

2017 de goreyê cigêrayîşêkî se ra 32ê ciwanan dîyar kerdo ke ê nêwazenê neteweyanê cîyayan reyde heman cayî de bibê, se ra 70ê ci nêwaşt ke sûrîyeyîjan de heman cayî de bibê.

Rêxistinê faşîstî partîyanê sey MHP û BBPyî 'nerm û pasîf' pênase kenê û xo rêxistin kenê. Nê komî perwerdeyê çekdarî vînenê, kampan awan kenê û platformanê sey , Instagram, Twitter (X) de propagandayan weşanenê.

Nê rêxistinê faşîstî dûştê koçberan ê. Fikrê nê rêxistinan ê bingeyîyî wina yê:

Dişmenîya koçberîye kenê, pawitişê fikrê tirkayetîye kenê, Enver Paşa sey qehremanî vînenê, dîmen û nuşteyê serê serwerîya tirkan pare kenê, taktîkanê Îtîhat û Terakî ser o xo rêxistin kenê,  kesê sey Cem Ersever û Abdullah Çatliyî zî xo rê qehreman vînenê û zafê sempatîzanê Partîya Zaferî ya Umît Ozdagî yê.

Mîyanê nê komanê faşîstan de tewr zaf 'Ataman Kardeşligi' şinasîyena. Koma Atamanî Telegramî ser de manîfesto weşana û dîyar kerd ke hedefê nînan o verê 'kiştişê ereb, kurd, afgan û pakîstanijan' û oyo diyîn zî 'kiştişê yahudîyan, afro-amerîkayîjan û farsan' û oyo hîrêyîn zî 'kiştişê armenî, rûm, çerkes û arnavutan o.'

Ataman Kardeşligi 2020 de awan bi, hêrişê Eskîşehîrî ra dima hesabê ci yê Telegramî ame qefilnayene. Nameyê Atamanî hêverî eşkerayîyanê Umît Ozdagî ra dima eşnawîya û nînan Îstanbul de dest pê perwerdeyê çekdarî kerd.

Kome hesabanê xo yê Telegramî ser de broşurêkê bi nameyê 'Perwerdeyê Şerê Taktîkî yê Atamanî' weşana û mojna ke ganî 'perwerdeyo çekdarî senî bibo.'

Ataman Kardeşligi ra ber komêka bîne ya aktîfe zî Sansasyonel Turan Bîrlîgî (STB) yo. Na kome Telegramî ser de vera koçberanê sûrîyeyîjan hêrişan plan kena û wazeena ke hêrişî ra ver û dima dîmenî bêrê girewtene.

Nînan ra pey koma Turanvarî zî wayîra zaf endaman a. Na kome dîmenê hêrişanê vera gerîlayan û fotografanê gerîlayanê ke ameyê qetilkerdene weşanena.

Nameyê komanê faşîstan ê tirkan ra tayî wina yê:

Ataman Kardeşliği

Türkçü Mücadele

Türkçüler Birleşiyor

Nasyonal Türk

Sansasyonel Turan Birliği

Atatürkçü Medya

Türk Otağı

Turanvari

Karargâh

Tengrizm