Serdozgerîya Komare ya Adana çarçewa tehqîqatê vera Komeleya Kultur û Hunerî ya Binevşe de derheqê 38 kesan de bira destbendkerdişî daye. Polîsan çarçewa tehqîqatî de Adana û Amed de eşt xeylêk adresan ser.  Sereştişan de polîsan berî şikitî, keyeyî serûbin kerdî, şarî rê şîdet kerd û cigêrayîşo rût ferz kerd.

Adana de Hemserekê HDPyî ya Adana Hêlîne Kaya û Mehmet Karakiş, Hemvervatoxê DBPyî yê Çukurova Şîlane Turga û Enver Guler, Hetkarê Şaredarê Seyhanî Funda Buyruk û Mehmet Saît Dîkmen, Abdurrahman Oral, Hayrettîn Oz, Sever Uzun, Mehmet Saruhan û Mahsun Uzun zî tede xeylêk kesî ameyî destbendkerdene. Destbendkerdeyî ameyî berdene bi Mudirîya Asayîşî ya Adana.

Komeleya Binevşe de û odaya Hetkara Şaredarê Seyhanî Funda Buyruk Funda Buyruk de cigêrayîşî dewam kenê.

Dîya zanayene ke polîsan keyeyê Mehmet Saît Dîkmenî de ferdanê keyeyî rê îşkence kerd, cinîyêke oda de tepişte û cinîye rê cigêrayîşo rût ferz kerd.