Seba ke vera hêrişanê îşxalî yê serê Metîna, Zap û Avaşînî tewirêko hempar bêro mojnayene rayberîya KNKyî de Komxebata Tewirê Neteweyî yena kerdene. Komxebata ke bi hawayêkê onlineyî yena kerdene Hewlêr, Silêmanî, Dihok, Kobanê, Qamişlo, Ewropa, Rûsya û Amerîka ra tewr tay 200 kesî tewrê ci bîyî.

Tay tesbît, ercnayîşê rewşe û vengdayîşê ke komxebate de ameyî kerdene wina yê:

Stratejîya hempare: Dewleta tirke Efrînî ra heta Serêkanîyê, Şingalî ra heta Avaşînî operasyonê çinkerdişî kena. Eke pê stratejîya hempare vera ney xoverdayîş bêro kerdene netîceye do bêra girewtene.

Wayîrvejîyayîşê xoverdayîşî: Gerîlayê ke bi rojan o vera hêrişan xo ver danê ganî têna nêrê verdayene. Seba wayîrvejîyayîşê nê xoverdayîşî pêro dinya de ganî nawnayîş û pêvînayîşî bêrê kerdene.

Vengdayîşê Amerîka û Ewropa: PKK seba azadîya kurdan têkoşîn keno. Ganî PKK nêro krîmînalîzkerdene û lîsteya terorî ra bêro vetene.

Tewiro hempar:Bername û îdeolojîyê ma yê cîyayî ganî verê tewirêkê hemparî de asteng nêbê. Kurdî senî ke Kobanê de raweriştî ganî reya tewirêkê hemparî bimojnê.

Kes bêveng nêmano: Tay hêz û dezgehê medyaya Başûrê Kurdîstanî vera hêrişan bêveng ê, ganî na rewşe bêra rexnkerdene. Wa kes vera hêrişan bêveng nêmano.

Yewtewir şert o: Kurdî vera hêrişan yew tewir bigêrê ke hêzê mîyanneteweyî bêveng nêbê.

Armancê dewleta tirke: Serrgêra 100. ya Peymana Lozanî de Tirkîya wazena destkewteyanê kurdan werte ra wedarna. Dewleta tirke wazena kurdan qir bikera.

Tehlukeyê vera Başûrî: Vateyê 'Hêrişî vera PKKyî yê' korbîyayîşêko pîl o sîyasî yo. Destkewteyê Başûrê Kurdîstanî binê gefêkê pîlî deyê. Hêrişê vera Zap, Metîna, Avaşînî parçeyê hêrişê vera Şingal û Kerkûkî yê.

Hîşyarîya Rojhelatê Kurdîstanî: Tehluke esto ke nê hêrişî vera Rojhelatê Kurdîstanî zî bêrê kerdene. Coka ganî têkoşînê çar parçeyan rayîrê yewîya neteweyî de bibê yew.