Semedê Ûgûr Şakarî yo ke vera tecrîdkerdişê Rayberê Şarê Kurdî Abdullah Ocalanî bajarê Krefeldî yê Almanya de bedenê xo vêşna, eşkerayîya çapamenîye ameye dayene. Îdarekar û endamanê NAV-DEM, AGÎF û ATÎK’î ya pîya xeylî kesî tewrê ci bîyî.

Eşkerayîye de ame vatene ke rewşa Şakarî krîtîk o û bedenê ey se ra  67 vêşaye yo.

Parlementera HDP’yî ya  Sêrtî ya verêne Besîme Konca zî eşkerayî de qisey kerd. Konca  vat ke ê çalakîya xovêşnayîşî raşt nêvînenê û  best pa:‘‘ Waştişê Şakarî û xoverdayoxanê gerevanê vêşanîye yew o. Şakar mektube xo de bale anceno bêvêngîya Ewropa ser o û vano ke seba protestokerdişê înan xo  vêşneno. Ganî ma zî sere de cinî û ciwanî bi çalakîyan bêvêngîya înan şermezar bikerê. Xoveşnayîşê Şakarî ra hukmatê Almanî zî mesuldar o. Ganî ma vera nayê vêngê xo berz bikerê.‘‘

Hemsereka  NAV-DEM’î Aytan Kaplane zî bale anta hêrişê hukmatê Almanî yê vera Kurdan ser û vat ke  Almanya de çalakîyan ra heta renganê ma heta hêrişê kitabanê ma kenê. Ganî ma hem dewleta Almanî hem zî dewlata Tirkî ra vajê hinî bes o.

Reyna bi nameyê AGÎF û ATÎK’î qiseykerdişan de tecrîd û bêvêngîya Ewropa ameyî protestokerdene û xoverdayîşê grevanê vêşanîye ame silamkerdene û mesajê berzkerdişê xoverdayîşî ameyî dayene.